حكاية السلطان المملوكي فرج بن برقوق

الناصر زين الدين فرج بن برقوق 

للى لسه صاحى ...

هنقول حدوتة ... بعد دقايق

النهاردة حتة مملوكى من الحتت الشيك الرومانتيك

على رأى عم صلاح جاهين اللى تخليك تشكر اهاليك اللى ما ولدوك زمن المماليك !

واللى متعود على حكاوينا هيعرف ان المماليك بأختصار يعنى ...

الغدر والخيانة والتكالب ع السلطة

والمملوك ما هو الا .... #قاتل_و_مقتول

ورغم ان المماليك قعدوا فترات طويلة يخطفوا كرسى العرش من بعض من اول شجر الدر ما حكمت

الا ان بعض السلاطين أصروا ع العادة الزفت دى للأسف

وللأسف

 لأنه كل ما نحكى بنكتشف ازاى

ان التوريث دا لعنة حقااااا

داست كل اللى حاول يرسيها قاعدة

وما نجا أحد

وبطل حكايتنا الليلة دى منهم

مش هركز قوى ع الأب

لأن بطلنا هوه الأبن

بس لازم نحكى انه ف ف يوم جه مصر شاب

من أصل شركسى

وكان من الفرسان وصعد ف المناصب العسكرية

وفضل يعلى ويترقى لحد ما بقاله شأن وسطوة ونفوذ

وهوب ف ليلة وضحاها استغل الظروف

وبقى سلطان مصر

واشتهر بأسم .. السلطان برقوق

وسى برقوق مكنش اسمه برقوق اصلا ولا حاجة

بس يقال عشان عينه كانت جاحظة ...

الناس سمته كدا :)

وبرقايقو كان متجوز

وعنده جوارى والأفلام دى

قوم ف 3 لحظات شقاوة كدا

خلف 3 اولاد

فرج وعبد العزيز وابراهيم

وقرر يرتب أموره عشان يمسكوا السلطنة من بعده

واشمعنى عيلة قلاوون يعنى !

السلطان قلاوون قعد هوه وذريته يحكموا مصر ييجى قرن بحاله أبنا عن أب لحفيد

وبرقوق حب يكرر الحكاية

و طبعا انتوا هارشين المماليك مش هقولكم ّّ

أى أمير يقعد على كرسى العرش من هنا

وهوب تلاقى باقى الامرا منفسنين

ويقعدوا يحربوا عشان يشيلوه ويقعدوا هما

وتبتدى المؤمرات تشتغل

ويبتدى كل سلطان يخّلص على رجالة العهد السابق

ويقرب الأمرا الأقويا بالترغيب

او يقتل بعضهم لو معرفش يستميله

ونقعد ف الهم اللى ما يتلم دا

زمن

السلطان برقوق اتطبقت عليه القاعدة دى بحذافيرها

والمنافسين فضلوا يحربوا وراه لحد ما شالوه من العرش

ف يوم أغبر

وقولولى ليه ؟!!!!

عشان الراجل يا خويا كان قاعد لا بيه ولا عليه

فجأة قالوله مراتك خوند شيرين خلفت ولد

ومبروك

ودقيقة وقالوله

انتا اتعزلت يا حاج !!!!!!!

برقوق اتشاءم بالمولود النحس دا

وهوه بيلم ف خلجاته عشان يهرب م القلعة

سألوه هتسميه ايه

قالهم "بلغاق" يعنى بالتركى معناها "الفتنة" أو اللخبطة

المهم الست شيرين

ربنا أراد ابنها ميتسماش الأسم المنيل دا علطول

والسلطان برقوق يلم التعابين

ويرجع بمساعدة مماليكه ويسترد العرش

وغير اسم الولا يا برقايقو عشام خاطرى

قالها من عينى يا ست

بلاش بلغاق

ونسميه فرج

وف خضم اللخبطة الملخفنة دى حد هيسالنى

امه اسمها شيرين وتجيب فرج ازاى ؟

فأرد اقول عادى .. ما سحر جابت عبعال !

والمهم بلغاق بقى فرج يا ام فرج

قشطة كدا

:)

لا مش قشطة

دا هباب وزفت ونيلة سودة على دماغنا

عشان سى فرج دا هيبهدلنا ويبهدل البلد كلها معاه

بهدلة السنين يا عم الحاج

وانتا السبب حضرتك !

عشان السلطان برقوق هيكمل ولايته التانية

ويقرر يعمل مجلس وصاية مكون من شوية امرا

عشان يبقوا أوصيا ع التلات عيال

أولياء العهد

فرج واخوي

وف مرة كان واقف زى الأسد كدا ف القلعة

بيشرف على شوية اصلاحات

وطب ساكت

ودخلنا ف موال جديد خااااالص

ويلا نجيب أكبر الاخوات عشان نورثه

حلو؟

لا مش حلو

عشان ياريت شيرين كانت قعدت ع الولا فطسته

ولا خلته عاش

لأن سيادته لما مسك العرش كان ابن 10 سنين يا دوب

ودا كان مشكلة

عشان هوه لم يبلغ الحلم بعد

وبالتالى ال اوصيا عليه هما اللى كانوا بيملكوا كل شىء

وهوه كان مجرد كيس جوافة

يشيلوه ويحطوه ولا يقدر يتكلم !

والمشكلة الاكبر

انه زى ما ورث مكان ابوه

ورث كمان حظه و like father like son

وحصل ف عهد اضطرابات برا البلد وجواها

خلت مركزه يتهز

امرا الشام اتمردوا وحاولا ينفصلوا عنه ..

وكل واحد طمع ف امارته

فالأمرا ف القلعة اتلموا

وحضروا جيش وخدوا برقوق على رأس الجيش

وراحو الشام

والشهادة لله .. الولا برقوق المراهق كان شيرس

وشديد وبيّن أمارة

كان فارس

وتم القضاء على كل الثورات اللى هناك

بس بعد ما دبح خلق ياما وبهدل الدنيا

ورجع مصر رافع راسه

وعامل لنفسه سمعة

وابتدت رجله تشيله بعد ما دخل ع المراهقة

قام الأمرا الكبار ابتدوا يخافوا منه

وابتدت الدسائس تشتغل

وعلى حظ امه الدكر حصلت مجاعة

بعد النيل ما نقص

وطبعا الجند الأتراك كانوا ناهبين خير البلد

فالفقر زاد وغطى وجنب الجوع

جه الطاعون معاه

والامرا الكبار تصارعوا ما بينهم على النفوذ

زى ما بيحصل دلوقتى

بين الاخوان والعسكر وبتوع السلفية والفلول تماااام

وكله بقى يقطع ف البلد

:(

لحد ما بقت خراب ...

وبيقول المؤرخين ان عدد سكان مصر نقص التلت

تلت سكان البلد راح ف المصيبة دى ...

منك لله يا #مورسى يا وش الخراب

الموقف بقى زفت زى ما حكينا

وطبعا الكل كان بيعمل لمصلحته

وبيستعد بعد البلد ما خوخت

انه ينط على كرسى السلطنة

فرج بن برقوق حس ان حياته ف خطر

وحس ان الامرا بيستعدوا لقتله

فزى الافلام الهندى كدا خرج ف ليلة من القلعة

ومرجعشى

وبيدوروا عليه ملقهوشى

واختفى وفص ملح وداب ...!

الامرا كانوا هيتجننوا طبعا

وقعدوا يدوروا عليه ف سلقط ف ملقط

معرفوش يعتروا فيه

وف الاخر اتلموا وقرروا يسلطنوا اخوه عبعزيز

الأخ الأصغر ويليه

عبعزيز كان أصغر من اخوه طبعا

فكان هلاهوطة كما يقول الكتاب بالضبط

والأمرا ودوه الحريم يقعد ف حضن امه

بعد حفل التنصيب ومشفش كرسى العرش تانى

و بس قالوا نبتدى بقى نعمل سبوبة

على حس السلطان الجديد ونسرق زى الاول واكتر

وهوب هما 70 يوم بالتمام

ولقوا مين طالعلهم زى الخازوق كدا ؟!

فرج بن برقوق طبعااااا

اللى بعد شهرين وعشرة تيام رجع مدعوم

بمماليك ابوه المخلصين

وراح طالع القلعة بقلب جامد

وحصلت عركة بين الطرفين

فرج و مماليكه ... طرف أول

و الأوصيا ع العرش الامرا العضمة الكبيرة .. طرف تانى

وأظهر فرج شجاعة

وغلب الحرس القديم

ودخل من تانى قاعة العرش

الكلام دا يا جماعة كان سنة 1405 م

ومن هنا تبدأ فترة ولايته التانية

وعشان كدا قولنا انه واخد حظ ابوه

اللى برضو حكم مرتين

وفرج لما رجع كان اكبر سنا

واكتر خبرة

وأشد شراسة

واتعلم يتخلص من كل اللى عادوه

ومصدر خطر عليه

وقايمة الأمرا اللى اتفشخوا وقتها كانت طويييلة

الامرا دول كانوا موظفين ف أغلب المناصب

وفرج معتقش الحقيقة وزرا واستادارات

ونظار جيش و كل ما تتخيلوا

وصولا لشيوخ العربان وكبار التجار

وغيرهم

كل اللى ساق العوج

او لاوع وقال معييش فلوس

او استهبل

فرج مكنش عنده يامه ارحمينى

وف عهده حصلت كمية مصادرات

وقتل ... بالعبيط

ونحكى امثلة !

الواد كان راجع شايل ومعبى ومش طايق حد

طبعا اول حاجة عملها انه يأمن نفسه من ناحية المنافسين

ف العرش

ومش بتكلم بس ع الامرا

بتكلم عن اخواته

لأن فرج اخد ف الأعتبار بعد اللى حصل

من تنصيب اخوه الصغير سلطان من بعده 70 يوم

انه لازم يخلص م الشوكة اللى ف حلقه دى

وبأى تمن

وقد كان :(

الواد المهروش استنى كام شهر كدا

وبعدين بعت اخوته الأتنين اسكندرية

قال عشان عبعزيز كمحتاج يغير جو

وهما 3 اسابيع ومسكته الحمى

ومات

لوحده ؟؟

لأ طبعا ...

ابراهيم اخوهم الاصغر حصله بعد يومين

وبرضو بسبب الحمى !

وطبعا الغالبية هرشت الحكاية

وان فرج عمل معاهم الدنيئة وتخلص منهم

:(

وابتدى يتفرغ بقى لنفسه

وازاى يعيش حياته

ويغرق ف الملذات ويعبى من المتع

وكان مشهور بشرب الخمرة

والمسخرة والذى منه

حسبما تقول المصادر !

طبعا البلد كانت عايمة على بحر من الفساد

بدأ من عهد والده الحاج برقوق أفندى

ربنا ياخده كمان وكمان

وليه بقول كدا ؟

أقولكم ليه

عشان برقوق الاب دا يوم ما مات

ومات فجأة يعنى بعد كام سنة

ومكنش عمّر كتير ف الحكم ساب ثروة

تقدر ب مليون

وحوالى 700 ألف دينار يا ثاااامح !!

دا غير 5000 حصان وبغل

و 4167 جمل

وغير الجوارى

و الجواهر الخ الخ

ومحدش يلطم انا لطمت بما يكفى

لما قريت الأرقام دى ومش مستنية حد يساعد !

ودا طبعا حصيلة واحد مات فجأة ..

يا نضرى

ملحقش يحوش ويامن مستقبل العيال

ويجيبلهم شهادت البنك الأهلى أ وب وج وكدهون

#مسكييييين

طبعا اذا كان رب البيت بالدف ضاربووون

فطبيعى يكون أغلب شيمة امراء المماليك الرقص والنهب

وكل ما ف هذا السياق

ومعذروين اللى لقى حرام ومسرقشى؟!

طبيعى تبقى نهيبة

وكل واحد عاوز ينتش منها حاجة يعمل كدا

ويستقوى برجالته ونفوذه وعلاقاته وسلاحه زى الاخوان

ما بتعمل والجيش وغيرهم

البلد كانت خرابة حرفيا

والجيش منقسم على بعضه والصراعات على أشدها ...

وفرج غرقان ف لم الفلوس وقتل الناس

وحكاياته هنا لا تنتهى

ومنها ....

كان ف زمان فرج القضاء نزييييه زى أيامنا كدهون

واشتهر احد القضاة وقتها واسمه الصلتى

بأنه بيغير مذهبه من مالكى لشافعى حسب المناصب .. !

كان فيه امرا بيعملوا مصايب وهما عارفين انها مصايب

ومع ذلك بيعملوها

واحد الأمرا اشتهر بلقب (الغطاس)

من كتر ما بيهرب كل ما يعمل عملة !!

بعض رجال الدولة توحشوا بشكل رهيب

واشهرهم كان جمال الدين يوسف البيرى

اللى كان استادار يعنى متولى شئون السلطان وقصوره

زى زكريا عزمى كدا ..

وسى زكريا عزمى زمانه

كان مفترى افترا السنين

وخرب بيوت ناس كتير سواء مماليك

اومن عامة الشعب بسبب الظلم والطمع

واستأسد على فرج لمدة

لحد ما الولا ما شم نفسه ورجعله ف تانى فترة

واستنى عليه استنى عليه لحد ما خده ع البارد كدا

وتحين لحظة اصطياده

و ف قاعة العرش وقف يقول لرجاله

مين يعرف يأدب جمال الدين كويس ؟

فرد احد المقربين

وقال : يا مولانا السلطان‏

جمال الدين كلب لا يتسلمه إلا كلب مثله

فرد واحد تالت

وكان اسمه تاج الدين عبد الرزاق بن الهيصم‏

وهتف قائلا بكل شماتة :‏

أنا ذلك الكلب

ففرج انشكح

وقاله خده وورينى شطارتك !

تاج الدين دا كان بينه وبين جمال الدين شوية مشاكل كدا

ملخصها ان جمال كان عاوز يعمل معاه الجلاشة

وملحقشى

فتاج استنهز الفرصة عشان يردله الجميلة

زائد انه كان طمعان ف منصبه اللى بيتاكل منه الشهد

فقرر يقوم بالمهمة القذرة دى بكل اخلاص

عشان يكسب ود السلطان

و اخد جمال الدين ... الحزين

وطبعنننننن

مفيش داعى أقولكم عن المماليك

وحنيتهم

وطييييبة قلبهم

ورقتهم

خصوصا لما يكونوا زعلانين من بعضشيهم ف حاجة

وتاج كان قارش ملحة جمال

فخده بيته يضايفه

و فين يوجعععععك

بقى جمال الدين يا عينى اتعصر حرفيا

استخدموا معاه المعاصير

وكنا حكينا عن سجون المماليك زمان

و مفيش داعى نقول كمان !

طبعا جمال الدين مكنش لوحده

كانله اتباع واخواته كانوا بيساعدوه

كل دول اتلموا واتصادرت فلوسهم

واصلا كان فيه اشاعة ان جمال الدين دا لقى كنز

الكنز دا قالوا انه لقاه ف بيته ف بين القصرين

وانه من ايام الفاطميين

والمهم بعد التعذيب والبهدلة

لموا من وراه بعد الأعتراف .. قولوا كام ؟؟؟

900 ألف دينار وشوية ... !

ابن الناس الطيبييييين كان عاملاهم

ومخبيهم تحت البلاطة !

وفرج طبعا لما سمع الرقم اتلحس

وبعته لواحد أبشع يعذبه اكتر

بعته لواحد اسمه حسام الدين الأحول

ودا بقى زى سلموة الاقرع كدا وميعرفش أخوه

حبسه ف قفص حيوانات

وقعد يعذب فيه عشان يطلع فلوس كمان

وف الأخر اللى حواليه حذروه من انه لازم يقتله

عشان جمال دا لو عاش والسلطان عفا عنه ..

هيخرج ينتقم من الكل

والاحول اول واحد هيتفشخ

الاحول خاف

وراح خنقه الاول ..

وبعدين قاطع رقبته وبعتها للسلطان فرج

اللى امر بدفنها مع الجثة ف مقابر المماليك

وبكدا انتهت حكاية جمال الدين المفترى

اللى كان نموذج لرجل دولة فاسد

نموذج تانى بقى من قلب القصر

وكنت حكيته زمااان

واللى متابعينى يفتكروه ...

حكاية فرج مع طليقته !!

احنا اتفقنا خلاص ان فرج دا كان مجنون فعلا

ودماغه مهروشة

الراجل اتجوز بنت نايب غزة

وكان اسمها بنت صُرق

وبعدين متفهموش اتطلقوا ليييييه ؟!!

طبعا احنا عارفين ليه بس مبنقولش على النت

هيا طبعا عرفت انه مش طبيعى

وهلاس وفيه كل العبر

جت ف مرة اتهبلت وقالتله طلقنى

راح مطلقها

حلو؟

لا مش حلو

عشان الست افتكرت انها خلاص بقت حرة

ودخلت ف علاقة عاتيفية مع امير اسمه الطبلاوى

واتفقوا ع الجواز لما ربنا يسهل وكدا

قوم ايه ؟

الخبر يوصل لفرج ..

ومسكوا ودانه بقى

طليقتك بتحب ...

هتتجوز عليك ..

سمعتك هتتفشخ ..

لازم تقتله يا مولانا

المهم سخنوه وقالهم قولولها عاوز أشوفها

فبعتولها

الست يا خويا مدتش خوانة ومتعرفشى حاجة

افتكرت الراجل مكسوف

وعاوز يصالحها

وهيغنى غلطة وندمان عليها

قامت متزوقة و متحنية ومتشيكة

وراحت ع القلعة

ودخلة قاعة العرش ام عواميد كتير

ومساء الفًل يا مولاى ..

وكدا برضو يا برقوقة يا خاين متسألشى عليا

ولسه هتتلفت

راح مطلع سيف صغنن ومديها

مديها فين ؟

ف كفها حضراتكم

وقطعلها صوباعين والتالت على وشك

الست اتسرعت

ولسه يتستوعب الموقف

وبتديله ضهرها عشان تجرى

راح مديها بالسيف ف كتفها قطمه نصين

بس بقى والادرلينالين اشتغل ...

وفضل يجرى وراها من عامود لعامود

والست تصوت ان حد يلحقها

لا يممممممكن

لحد ما راح فاصل راسها عن جسمها !!!

وبص ف القاعة لقى دمها مطرطش الحيطان

نده لحراسه ينضفوا المكان

وطلب شوال حط فيها راسها

وبعت الخدم يستدعوا الأمير الطبلاوى

وقعد ف هدوءءءءءءء يشرب قهوته

و شوية صغننة ودخل الطبلاوى

فاكر ان فرج عاوزه ف مصلحة ولا حاجة

وقرب من كرسى العرش

وبيوطى راسه احتراما وبيرفعها

لقى فرج بيطلعله راس البنية!

وبيخرجها من الشوال وهوه ماسك الضفاير

طبعا الطبلاوى اول ما شاف المنظر كان هيعيط

وفهم علطول

ولسه بيوطى راسه تانى فزعا

وهيقول سامحنى ى ى

راح فرج مطلع السيف الصغنن

وجازز رقبته هوه روخر

وبيقولوا ان برقوق

حط راس الطبلاوى مع راس بنت صٌرق

وامر يدفنوا سوا ف مقبرة واحدة

#ياااااااا_حونيييين

الملخص عشان مطولش عليهم

الولا كان مجنون مجنون

كما تذكر كتب علم النفس السابقة واللاحقة

وكما يشهد بوز الترابيزة الرخام

وخبطان النافوخ والتربنة انتوا عارفين بقى

واخيرا عشان ننهى الحكاية

لأنى دايما بحب النهايات بتاعت الظلمة

لأن كلها عبر ومعانى

يا ترى فرج دا ...

غار من وش ام البلد دى ازااااااى ؟؟؟

بسيطة ..

البلد كانت خرابة ومليانة فسدة وظالمين

زى منتوا شايفين

غير ان المجاعة والأمراض والصراعات الداخلية

انهكتها جدا وخلتها مطمع

الاول حصلت فتن ف الشام

وبعدين ظهر خطر تيمورلنك

و كل شوية يحصل قتل ودبح

والبلد مستقرتشى

ولا عجلة الانتاج دارات ولا نيلة

غير ان فرج كان بلوة

وكل مدى ما يتوحش اكتر واكتر

وكل شوية يقتل كام امير ويصادر فلوسهم

الأمرا خافوا على اعمارهم ونفوذهم

وقرروا يتغدوا بيه

وبعتوا للخليفة

الخليفة وقتها كان المستعين بالله

وكان مجرد منظر وبيدعوله ع المنابر جدعنة

ولا له نفوذ ولا نيلة بس اهو اسمه الخليفة ودمتم

راحوا باعتينله

وقالوله بص يا عم الحاج ..

انتا مش مطلوب منك أى حاجة

بس تعالى اترزع على كرسى العرش بعد ما نخلع فرج

واهو الشعب لما يشوفك هيسكت ومش هيتكلم

الخليفة طبعا كان جبااااان وخاف على عمره

وقالهم بالمفتشر كدا فرج دا سماوى ونابه ازرق

ولو قتلنى هتنفعونى ؟!!

قاوله ملكشى دعوة احنا هنتصرف !

الحقيقة انهم اختاروا التوقيت المناسب للمؤامرة دى

لأن فرج بن برقوق كان ف الشام

ودمشق تحديدا عشان بيقتل ويعذب حد كالعادة

وهما استغلوا الفرصة

الاول رتبوها قانوني

جابوا القضاة وقتها وخدوا منهم فتوى

بخلع الناصر فرج بن برقوق

وجواز تمكين المستعين بالله مكانه

بإعتباره خليفة المسلمين

طبعا القضاة بصموا ...

الورق ورقنا والدفاتر دفاترنا

ببساطة كدا يا طمطم

آه طبعا

بقولكم كانوا بيحولوا من مذهب لمذهب

عشان المنصب عادى

ومنهم قاضى كان لقبه "السفاح" ..

تخيلوا !

قاضى وكان الناس مطلعة عليه اللقب دا

شوفوا انتوا بقى تبقى ذمته عاملة ازاى ؟!!

المهم القضاة كيفوها دستوريا

و الأمرا استعدوا عسكريا

وساعة الصفر جت

وبمساعدة دمشقية من امرا هناك

تمت محاصرة المذكور

فرج افندى برقوق ف قلعة دمشق

وجالك الموت يا تارك الصلاة

وعقبالك يا مورسى النحس لما يحبسوك

وطبعا أفيش داعى أقول ان فرج قعد يزعق

ويقول انا سلطان مدنى منتخب

ومش كل شوية امرا يتلموا ويعملوا استمارات

ويمضوا ورق

ويقولولى مع السلامة همشى

والحركات دى انتوا هارشين

والناس انقسمت فريقين ..

جزء شاف انه ظالم والخروج عليه واجب

وجزء شافه سلطان شرعى والخروج عليه حرام

بس القوة غلبت الجزء العاطفى ف النهاية

وف ليلة أشد جمالااااا من ليلتنا تلك

بعد حصار كام يوم ف الاتحادية ..

قصدى قلعة دمشق

بعد نص الليل فرج لقى كام نفر داخلين عليه

#هع_هع

كانوا تلاتة من كبار القوم كدا واتنين عساكر

التلاتة كانوا كالآتى :

1 يبقى اخو الخليفة المستعين

و2 من امرا المماليك

و فرج اول ما شافهم فهم

وراح قايم فازز من سريره

ودخلوا عليه بالسكاكين وهوه أعزل من غير سلاح

قعد يقاوم فيهم بإيده لحد ما جابوه الأرض بيفرفر

وبيطلع ف الروح

جوز العساكر قربوا منه لقوا لسه فيه النفس

واحد منهم وطى عليه يخنقه

بعد شوية لقاه لسه بيتحرك راح خانقه تانى

بعد شوية لقاه لسه عايش خنقه تالت!

واخيراااا بعد ما مات وبالعافية يعنى

راحوا شايلينه هيلا بيلا

ومن شباك البرج ورامينه ..

زى شجر الدر كدا تمام ووقع ف مزبلة تحت القلعة

:(

كان تقريبا عريان وهدومه متقطعة الا ما يستر العورة

وبرضو زى شجر الدر تمام

قعدت جثته كام يوم لحد ما نفر من الدمشقية

صعب عليه حاله ومنظره

وخده يدفنه صدقة

و تخيلوا !!!!

سلطان مصر اللى كانت الدنيا ف ايده ف لحظة

يموت كدا

وسبحان المعز المذل يؤتى الملك من يشاء

وينزع الملك .. عن أكثر الناس جبروتا لما يشاء

وكل الفيلم دا بقى حصل والولا مات

وهوه عنده كام سنة ؟!!!

24 سنة و 8 شهور وكام يوم بس !!!

بس بعد ايه ؟؟ بعد فترة حكم حوالى 13 سنة

مصر اتعجنت فيهم

والاخ بتاع النجوم الزاهرة زعلان قوى

ان فرج انقتل ومات كدا

وبيقول ف نهاية كلامه عنه

انه صحيح قرى كلام المقريزى

وموافق عليه من ان فرج بن برقوق ساب البلد خرابة

ونهيبة للغزاة

ومات تلت سكانها بسبب رعونته وطيشه

وانه كان خمورجى وهلاس الخ الخ

وانه كان وش نحس من ساعة ما أتولد

#مورسى_ستايل

وانه قتل من اهل الشام خلق ياما

وان ف عهده خربت السكة (الفلوس يعنى) والأقتصاد

واتدمرت الجسور ع السكك !!

وانه كان بيلم ضرايب من دم الشعب

وف حربه ف الشام مع المنافسين

لهف م الناس ألف ألف .. مليون دينار يعنى

وياريته انتصر !!!!

#مورسى_والنيعمة

وكوووول دا ف 13 سنة حكم

ومعلش بقى .. الاخ ابن اياس زعلان ليه

انه مات موتة زى دى ؟!!!

دى البلد اتفشخت يا راااااجل

والعدل انه يموت كمان وكمان !!

قصره الجدع أيد المقريزى على تعديد مصايب مورسى

قصدى فرج بن برقوق

قائلا ..

على أني موافقه على أن الزمان يصلح

ويفسد بسلطانه

وأرباب دولته

#ولكن البلاء قديم حديث ...

وعنده حق الولا شال تركة ابوه ..

واللى اتولد ف خرابة عبثا تقنعه بأنه يخليها جنة

الا بمعجزة فعلا !!!

واخيرا عشان المعلومة دى لطيفة الصراحة

لما قريتها

ان الاخ فرج بن برقوق كان ألدغ ف السين #ألهوى

بتخيل منظره وهوه بيقتل طليقته ولا أى حد ... باللدغة دى

يعنى عنب عنب !!

واخيراااااا قبل ما أقول تصبحوا على خير

وشكرا للمتابعة

كل مرة احكى عن المماليك او أى حد جه البلد دى

وقعد على كرسى عرشها ف غفلة من الزمن

بتأكد من نهايته

انه مصر دى معجزة بحق

وليها خصوصية وتفرد

وبلد تانية غيرنا كان زمانها

بعد كل هذا الشقى والغلب اندثرت

ولا سكانها ابيدوا

وثقافتهم انمحت ألف مرة بعدد الغزاة والطامعين

والملاحظ ان دايمااااااا

يقعد على عرشها كلاب السكك والسفلة والاوباش

وفيما ندر ييجى حد كويس

وابن ناس

وحاببها بجد

ومعرفش ليه كدا ؟؟؟

:(

هوه ليه ..

أكيد عشان خيرها الذى لا ينصب

وعشان بتتسرق من قديم الازل ولسه فيها خيرتانى

لكن السؤال .. فين الناس النضيفة

وليه مبتوصلشى للقمة ؟!!

ليه زى ما سألت مرة ف حدوتة زمان

هوه حكامك يا مصر دول مش حكام ..

دول سلسلة من الخونة يتخللهم حكام احياناااااا

#غريبة

ولهذا هذا الشعب شاف الويل وسواد الليل طول عمره

وقليلا لما يفرح وينتصر

فحبوها

حبوا البلد دى لأنها تستاهل

ومتيأسوش منها وتستخسروا فيها الخير

#فاتيما .. أول نشر 26/5/2013