قصة ثكنات قصر النيـل

ثكــــــنات قصــــر النيـــل

القصة من البداية 

حكاية النهاردة عن مكان مش كتير يعرفوه

ولا يعرفوا ان كان هنا اصلا

ولا يعرفوا شاف ايه

الليلة دى هنحاول نقول كل حاجة نعرفها

عن

ثكنات قصر النيل

واللى مكانه كان فى ميدان التحرير

جزء باصص ع المتحف المصرى والميدان

وجزء باصص ع النيل

وف قلب قلب القاهرة الخديوية يا ولاد ... !!

والقصة هتبدأ من زماااااان قوى

لما الحتة بتاعت ميدان التحرير دى

كانت مجرد أرض مليانة برك ومستنقعات

وييجى الفيضان يغمرها ثم ينحسر عنها وتملاها البرك

ثم الناموس وخلافه وتجيب امراض واوبئة

فالناس تبعد عنها ميسكنهاش الا الواغش

وأيام المماليك احد الامراء قرر يعمرها

وعمل لنفسه بيت كبير وألحقه باسطبل حصنة كبير

واشتهرت الحتة بزريبة قوصون

على اسم الأمير المملوكى

روح يا زمان وتعالى يا زمان

والمماليك راحوا ف الوبا

وجم العثمانيين

وانتوا بقى عارفين

ايامهم كانت حيلوة ازاااااااااى يا ابو سامية

التراكوة سابوا الحكم الفعلى للبكوات وامرا المماليك

اللى قعدوا يطحنوا ف بعض

ويحلبوا ف خير البلد هما والعثمانلية

وطبعا اهملوا أى عمران

قوم الحتة رجعت تانى

صريخ ابن يومين متسمعوش فيها

والفيضان ييجى يغرقها وينحسر ترجع برك

ومكان للأوبئة واللصوص وخلافه

لحد ما جت الحملة الفرنسية

وأونكل بونابرتة استغل وجود المنطقة دى

بعيدا عن القاهرة الفاطمية

وقالك اعملوا فيها معسكر للجنود يا عيال

ونضفوها شوية عشام نعرف نقعد

والاحتلال الفرنسى يا دوب قعد 3 سنين

وقال جااااى

ومشيوا

ورجعت الأرض تانى لحالتها من اهمال

ومحدش طبعا فكر يسكن فيها .. عشان ميجيلوش المرض

مستغنى عن عمره اياك!

ودخلت البلاد ف حالة حراك

بعد رجوع الوالى الموفد من الباب العالى

وبين الشعب

والامراء الموجودين على راسهم الألفى والبرديسى

وطبعا محمد على

وبعد سنوات قليلة من الصراع والمكر والدهااااااء

وقعت مصر ف حجر محمد على سنكفولة

زى ما كلنا عارفين

#روحى روحى روحى

سنكفولة ف وسط انشغاله بالحروب الخارجية

وقمع الثورات الداخلية

والتمحلس للباب العالى والنهب الممنهج لثروات الوطن

هيتجه لتعمير القاهرة

وطبعا هيختار لما يبنى لنفسه

او لاولاده اماكن بعيدة عن الزحمة والدوشة

خصوصا انه كان عرضة للأغتيال ف مرة بالأزبكية

فالراجل قال نتوسع ونبعد عن الدوشة !

وقعد هوه فووووق ف القلعة

وبيقولوا انه هيبنى سرايات لولاده ف كذا حتة

ومنهم سرايا لبنته .. نازلى

فى الحتة دى بتبص ع النيل علطول

واتبنت فعلا

وسموها .. قصر النيل

ومن هنا جت التسمية يا ولاد

من هنا جت تسمية المطرح

والشارع الشهير بوسط البلد

وكمان جت تسمية الكوبرى بعدين

القصد

الأخت نازلى

او نظلى كما يحلو للبعض كتابتها ونطقها

قعدت ف القصر اللى بناها باباها من فلوس الشعبببببب

سنين وسنين

لحد ما مات ف داهية

#روحى روحى قولنا

مسك بعد كدا حفيده ... عباس حلمى الاول

والواد كان براوى وإتم ومحدش بيطيقه

ولا هوه بيطيق حد

واتشاكل مع كل العيلة

وقعد يزهق فيهم لحد ما طفش عدد كبير منهم

على تركيا وغيرها

عمته نازلى كانت من الطفشانين برضو

بس العرق السنكفولى كان ناقح عليها

ومن شابه اباه

من تركيا دبرت لقتله ونجحت المحاولة

وانقتل عباس حلمى الاول ف قصره فى بنها

وابنه الهامى ولع الدنيا

وبيقولوا انه مسك اتنين من اللى شاركوا ف الجريمة

قتلهم

لكن طبعا نازلى كانت ف تركيا ف حماية الباب العالى

ومعرفش ينتقم منها

قوم اييييه ؟

ف وسط الهيصة دى راحت ولاية البلد

الى اكبر اعضاء الأسرة سنا حسب الأصول

ومسك سعيد باشا

ابن محمد على .. الحكم

سعيد باشا بقى كان حدوتة تانية غير عباس

الراجل كان بتاع بحرية

ومن صغره وابوه بيحاول يعلمه مهام الدولة وبتاع

فكانت اهتمامته منصبة على ذلك

وحاول يصلح اللى عباس حلمى بوّظه

يعنى اهتم بالجيش جدا

وحاول يزود عدده قدر الممكن

وكمان اهتم بالأصلاحات وحماية الثغور

واهتم بالنيل باعتباره منفذ على القاهرة وسكانها

وفى اطار خطته

هيشترى سعيد القصر من عمته نازلى

اللى مرجعتش تانى من تركيا وقعدت هناك

ويأمر سنة 1856 بانشاء رصيف على قصر النيل

ويبعت لمهندس اسمه موجيل بك

ويكلفه بهذه المهمة

ثم

السنة اللى بعدها يعنى 1857 هيأمر بهدم

جزء من قصر النيل وتكملة البناء عشان يعملوا

قشلاق يتسع ل6 الآف جندى

قشلاق .. يعنى ثكنة للجند .. بالتركى

وزى منتوا شايفين

انتا لو قاعد ف المدرجات معرفش ايه

هتشوف القشلاق او الثكنات على شكل حرف E

لكن لو قاعد ف المدرجات الأبصر ايه

هتشوفها على شكل رقم .. 3 ديجتال

او حرف M

أو حرف W ديجتال

أو اربعة ديجتال برضو ... انتا ومطرحك بقى

مش كدا بس ..

دا هيأمر بمد خط سكة حديد مخصوص للثكنات

عشان يسهل الحركة

ونقل الأسلحة والجنود وخلافه

ونركز ف الآتى يا ولاد

الثكنات تصميمها هيبدأ من اتجاه منطقة ابو العلا

بقصر سعيد باشا اللى كان قصر نازلى

اللى ف الصورة .. اعلاه

ثم يكتمل شكله بالمربعين

ناقصين ضلع اتجاه النيل

لحد ما يبقى ناحية شارع قصر العينى

وطبعا مكنش لسه كوبرى قصر النيل

اتبنى من اساسه !

وطبعا مفيش داعى أقول ان الثكنات دى

كانت مبنية على طراز فنى راااائع

وكل الصور اللى وقعت تحت ايدى تبين ذلك

ومش بس الصور الفوتوغرافية

اللوحات كمان المرسومة

للجنود والعساكر

مبينة ف خلفيتها

قد ايه كان بناء جميل

لدرجة تقهر القلب

ع اللى هيحصله بعدين

ونظرة سريعة بس

ع الحليات والزخارف والشبابيك والأبواب

مش ممكن ع الجمال يا اخوانا !!!

القصد

ثكنات قصر النيل أصبحت منذ هذا التاريخ

من عهد سعيد يعنى

هى المقر الرسمى للجيش المصرى

روح يا زمان وتعالى يا زمان

وبقى اسماعل هوه الوالى ثم الخديوى

وانتوا عارفين هوسه بجعل مصر قطعة من اروبا

قوم ايه ؟؟

سماعين هيكلف مهندسه الأثير

على مبارك

بالتخطيط للقاهرة الخديوية

اللى هتبدأ من الأزبكية ولحد الثكنات

وما بينهم من ارض تحول لطرق وعمارات

وابو توفيق هيكلف نفسه جامد الصراحة

وتتمهد طرق متعامدة على الثكنات لحد قصر عابدين

والعتبة زى شوارع قصر النيل والبستان وغيرهم

واسماعيل هيبنى لاحدى زوجاته قصر هناك

ويتسمى المكان كله .. ميدان الاسماعيلية

واللى بعديييين

هيتحول الى ميدان التحرير

مش بس كدا ..

دا هيأمر بنقل المدرسة الحربية من القناطر الخيرية

لثكنات قصر النيل

عشان يعمل رجل ف الحتة

والناس تروح وتيجى عليها

وبعد ما يبدأ يعمر جزيرة الزمالك

ويبنى فيها قصر للمخسوفة اوجينى

هيعمل كوبرى قصر النيل للربط بين قاهرته والزمالك

وبعد حكاية الكوبرى

هيبقى موقع الثكنات استراتيجى

بيربط بين كذا جهة

وقريب لقصر عابدين اللى بتاع سمعة

ودى المشكلة

ليه مشكلة يا شهرو ؟!!

أقولكم عشان اللى هيحصل بعد كدا

لما يحدث ف تاريخ مصر تغيرات كبيرة

ف عهد الخديوى توفيق

انتوا عارفين ان دلوقتى الثكنات

هى مقر الجيش المصرى

ووزارة الجهادية

والمدرسة الحربية

حلو

يعنى

حلو لناس .. لكن ناس تانية لأ

كان حلو لعرابى اللى هيظهر فى الأفق

ملوحا بمطالب الضباط زمايله ف الجيش

وشكواهم من ناظر الجهادية وقتها

عثمان رفقى

عثمان رفقى الجركسى الأصل

كان متحيز لبنى جنسه جراكسة واتراك

والترقيات لهم والمصريين يديهم صابونة

كان فيه غضب مكبوت ف الجيش لحد ما

طلع قرار فيما معناه ونتيجته

انه محدش هيترقى ابدا غير الاتراك والجراكسة وفقط

فمجموعة ضباط طلعوا على بيت عرابى يشتكوله

الحقنا يا عم !

عرابى واتنين من زملائه باعتبارهم اكبر المصريين

رتبا ف الجيش

(اترقوا ف عهد سعيد )

كتبوا عريضة لرئيس النظار

رئيس الوزرا يعنى

وحددوا مطالبهم بعزل ناظر الجهادية الحالى

ورفع عدد الجيش لأكتر مما هو عليه

وترقية الضباط بدون تمييز

ومضى امراء الآلايات التلاتة اولهم عرابى

ورفعوا العريضة لرئيس النظار اللى وشه جاب الوان

وقالهم ان دا تطاول وبتاع

وبعد عرضها ع الخديوى توفيق

حصل اللى حصل بما يعرف بــ حادث قصر النيل

حدث ايه يا شوشو ؟؟

ولا حاجة

ف نفس اليوم اللى قدموا فيه العريضة

جالهم دعوى لحضور حفل زفاف

مين يا شهرو ؟

اخت الخديوى توفيق

حلو ؟

اللى بعت الدعوة كان ناظر الجهادية سخصيا

اللى هما مقدمين طلب بعزله .. !!

قوم ايه ؟

عرابى ورفاقه توجسوا خيفة

وقرروا يرحوا الفرح لكن بأحتياطات

فى مذكراته بيقول .. عرابى يعنى

" ادركنا ان ف الامر خدعة واخذنا حذرنا

ثم ذهبنا الى الوقت المعين لديوان الجهادية بقصر النيل

انعقد لنا مجلس من الباشوات والقى علينا امر الخديوى

بإيقافنا ومحاكمتنا ونزع سيوفنا

وساقونا الى السجن فى قاعة بقصر النيل"

يا خراشى !

دا بدل ما تقعدوهم ف اول ترابيزة قرب الكوشة

وتجيبولهم حتتين جاتوه وازازة بيبس

تقبضوا عليهم .. أخص أخص ... !

وطبعا الاحتياطات هتظهر

لما يوصل الخبر ان عرابى ورفاقه اتقبض عليهم

وزميل رابع هيروح مع آورطتين

من حرس الخديوى سخصياااا عشان يطرقعلهم

قصدى .. يشوف زمايله مرجعوش من عندهم ليه .. ؟

ويحاصروا الثكنات ثم يقتحموها

ويخرجوا عرابى وزميلاه

وبيقولوا ان ناظر الجهادية ورجال المجلس هربوا

وراحوا على عابدين !

الحركة دى كانت اول خطوة ف الثورة العرابية

حادث قصر النيل

عرف العنصر المصرى ف الجيش ان له قيمة

وقدرة على الحشد والتكاتف

وبعدها ...

حصلت وقفة عرابى قصاد توفيق عند قصر عابدين

وما حدث بعدها

وبعدها

لحد ما استغل المحتل الصراعات وموالاة الخديوى لهم

و دخل الانجليز مصر

وبعد ما تاكد للانجليز هزيمة عرابى فى التل الكبير

دخلوا القاهرة واحتلوا ثكنات قصر النيل

كنوع من الرمزية

نظام اننا غلبناكم ودخلنا عُقر داركم وكدا

والثكنات منذ 1882 هتعيش ايام تانية خاااالص

خصوصا بعد ما توفيق رضخ للانجليز

وحل الجيش المصرى بعد 5 ايام من دخولهم

والثكنات هتتكلم انجليزى صحيح

لكن الأرض هتتكلم عربى

ومصرى

والمطرح هيتحول إلى قبلة للغضب

كل ما المصريين يتعصبوا من حاجة يروحوا

يحدفوا عليه طوب ومولوتوف لو تيسر

:)

روخرين الانجليز كانوا كيادين

بيقولك كانوا بيخرجوا ف الوسعاية قصاد الثكنات

يلعبوا رياضة

وثنى مد

وصفا انتبياااااه

بيغيظونا ولاد الهرمة

طبعا الموضوع الاستعراضى كان بيستفز الناس

لكن اللى استفزهم اكتر .. بلدهم وهيا بتتسرق

وتتنهب وتتمرمط

وتوفيق الوغد هيموت

ف داهية

وييجى بعده ابنه

عباس حلمى التانى

الشهادة لله الواد ابتدى معانا بداية حلوة

كان كاره للانجليز وعنده نعرة وطنية

لم حواليه نخبة المثقفين

ومن التوجهات السياسية المناهضة للاحتلال

وكان بيناطح ف الانجليز قدر استطاعته

ف الاول

والبدايات يعنى

وقتها اتحول الاسم .. الى الثكنات الأنجليزية

والمندوب السامى البريطانى مقره

كان مطرحه ف ميدان سيمون بوليفار حاليا

يعنى جنبهم برضو غلاسة

سنة 1904 خرج اقتراح من احد رموز عيلة قطاوى

اليهودية الشهيرة

بأننا نهد الثكنات دى بلا خوتة

ونخلى ميدان الاسماعيلية بلا عسكر ولا بتاع

موسى قطاوى كان صاحب الفكرة

وقال نزود العمارات والتماثيل الخ

وطبعا الفكرة اترفضت من قبل الانجليز ..

حد يسيب الحتة دى ويمشى ؟!!

وننقل ايه وبتاع ايه يا عمنا

البلد كانت داخلة على ايام سودة

عباس هيتشال وييجى مكانه حسين كامل

اللى يا دوب 3 سنين ويموت

ابنه يرفض العرش

فتسقط مصر لوزة مقشرة ف حجر احمد فؤاد

وبروح والدته .. كان جاى برضا الانجليز

وموطى وبايس الجدم

وسايبهم يعبثوا ف البلد

لكن على حظه الزفت بقى وحظنا الحلو

انه ظهرت افكار بعرض قضية مصر عالميا

للحصول على حريتها واستقلالها

كانت الحرب العالمية الاولى لسه خلصانة

وفيه روح جديدة

وافكار جديدة

ووشوش جديدة تبشر بخير

قوم سعد زغلول ولفيف من الاساتذة .. زملائه يعنى

قرروا الاتى

بعد اقتراح وتأييد من الامير عمر طوسون

من العيلة المالكة .. هذا الوطنى الجدع

آل ايه .. سافروا باريس يا جماعة ف وفد

واعرضوا قضيتنا

ولعل وعسى

الانجليز يسكتوا ؟؟

لأ طشبعن

هياخدوا اجراء

كتبه اسماعيل صدقى

(اللى هينقلب ع الثورة بعدييين )

فى مذكراته عن هذا الحدث

قال ايه ؟؟

" يوم 8 مارس - اليوم السابق على الثورة -

كنت اجلس فى مكتبى فى غرفة مجاورة

لمكتب سعد زغلول بمنزله

فجاءنى خادم ينبئنى بحضور ضابط انجليزى

وكان الضابط قد طلب من سعد باشا

ان يركب عربة عسكرية ثم دعانى الى ركوب عربة اخرى

وذهب بنا الى ثكنة قصر النيل "

جم كام جونى كدا واخدوا الآتى اساميهم :

1) سعد زغلول باشا

2) محمد محمود باشا

3) حمد الباسل باشا

4) اسماعيل صدقى باشا

وحجزوهم ليلة ف الثكنات

وتانى يوم كانوا مرحلينهم على مالطا !

طبعا الست صفية زغلول مسكتتش

وهدت الدنيا

وفورا الخبر انتشر

والدنيا قامت مقعدتشى

وبيانات واضرابات

عمال السكة الحديد أضربوا

وانقطعت الطرق وخطوط التليفون

ونزلت مظاهرات للشوارع عمال وموظفين

رجالة وستات

وسعد زعيمنا .. والناس جريوا ف الشوارع

يلفوا ع المحلات والبيوت

يعملوله ف توكيلات انه يتكلم بالنيابة عنهم

بس يا ثامح وقامت ثورة التمناتشر

وزودنا عليهم نفر ... بقت 19

ورضخ الانجليز للضغط

ورجع سعد واللى معاه

وخطوة جديدة بعد خطوة عرابى ...

بتتمشى ف سكة الحرية

بس وفضلت الثكنات بقى ف مرمى النيران الغاضبة

وقعدنا كدا

لحد ما خلصت الحرب العالمية التانية

وتااانى المصريين يقولوا الانجليز يغوروا بقى !

كان فؤاد مات سنة 1936

وجه مكانه ابنه الملك فاروق

ويجيله دلوقتشى قاعد بقاله عشر سنين كدا

حبة يهتفوله وحبة يهتفوا ضده

واحنا دلوقتى ف اوائل فبراير 1946

لما طلبة ف اعداد غفيرة هتخرج ف مظاهرة

من جامعة فؤاد الاول (القاهرة حاليا)

ف اتجاه قصر عابدين

عشان يطالبوا الملك بتفعيل اتفاقية جلاء الانجليز

عن القاهرة ورحيلهم لمدن القناة زى الاتفاق

وف الطريق عند كوبرى عباس

يحصل هرج ومرج وقصص كدا

والكوبرى ينفتح ع العيال

ويقال ان محدش مات كما هو شائع

وتن العيال رمت نفسها ف المية بس محدش مات

الا ف احداث ف طنطا

قصره

الموضوع وسع

واجتمعت القوى الوطنية

وقررت اعلان يوم 21 فبراير

يوم اضراب ف عموم مصر

وخروج تظاهرات تطوف ف شوارع المدن

للتنديد بما حدث

حلو ؟

لا مش حلو

عشان الداخلية هتاخد اوامر بعدم التعرض للمظاهرات

ومش طالبة مشاكل

المشكلة كانت ف الانجليز

لما مظاهرة القاهرة قربت من الثكنات !!

ساعتها عربيات الجيش الانجليزى من الهلع

دهست المتظاهرين

اللى الظاهر كان عددهم وروحهم حاجة كبيرة

لدرجة ترعب

دهسوا كام واحد يا شهرو ؟

كتير ..

مات كام واحد يا شهرو ؟

23 شهيد

غير الجرحى اللى عدوا الـ 100

المؤرخين بيقولوا انه بجانب افول الأمبراطورية

التى لا تغيب عنها الشمس

ان الحادث دا وغيره

دفع القوات الانجليزية للتراجع والجلاء عن القاهرة

عشان خلاص كدا بقم ف خطر داهم

بعد سنة وشهر يعنى ف مارس

1947 هيكون فاروق واقف ببدلته العسكرية

بيرفع العلم المصرى

على ثكنات قصر النيل

ايذانا بجلاء الانجليز عنها

وترجع الثكنات مصرية ... خالصة

ويرجع فرق من الجيش المصرى للتواجد فيها

وتدخل مصر حرب 1948

والبلد تغلى

والجيش تحديدا

وبعض ضباطه تحديدا فيما هيعرف بعدين

بالضباط الأحرار

وفاروق شعبيته تنزل للحضيض

وتنحرق القاهرة

وبعدها بشهور قليلة تقوم حركة الجيش

وتخلع فاروق من عرشه

تشهد صاحبتنا ع الأحداث كلها وعلى زمن جديد

بشخوصه واحداثه

وتفضل الثكنات ف مكانها

لكن التركيز للجيش هيكون ف العباسية اكتر

وتظهر روح تغيير

ينفذها عبداللطيف البغدادى

مين دا يا شهرو ؟؟

دا يبقى عضو مجلس قيادة الثورة

وهيبقى وزير الشئون البلدية والقروية

وبعدين يبقى نائب لرئيس الجمهورية

والراجل بناء على خطة هيحط تصور

لتغيير بعض الشوارع وتوسعتها وتغيير اساميها

ونزع تماثيلها الخ

بما يناسب العهد الجديد

ويمحى العهد القديم ورموزه

ومن ضمن التغييرات .. ميدان الاسماعيلية

اللى هيتغير اسمه طبعا

ويتبنى كورنيش ع النيل

وطبعااا لازم بكدا تتهد الثكنات .. ليه ؟؟؟؟

قالك لسببين

عشان هيا رمز للمحتل الأجنبى ولازم تتشال

ثم انها عقبة جمالية ف المكان بعد فتح الكورنيش

والاحسن تستغل المساحة ف حاجات تانية

يا جماعة طب دى عمرها قرب ع الــ 100 سنة

يعنى أثر .. وتاريخ !!!

المؤسف ان ثكنات قصر النيل سنة 1952

بس ف يناير

قبل الثورة بشهور سجلت كأثر

لكن القرار دا اتلغى سنة 1954 عشان الباشوات قالوا كدا

فجأة قرروا انه مش أثر !!

القصد

الهدم بدأ على قدم وساق

مع توصيات بالحفاظ على الحليات الخشبية المميزة

واللى منعرفش ودوها فين #اتلهفت_طبعا

وتم بناء 3 مبانى ف الحتة دى

مبنى جامعة الدول العربية

فندق النيل هيلتون

ومبنى الاتحاد الاشتراكى

اللى كان مفروض يبقى مبنى البلدية

بس بتوع الاتحاد الاشتراكى لهفوه

ومحدش قدر ينطق طبعا

وبعدييييين هيبقى مبنى الحزب الوطنى ..

ربنا ياخدهم جميعا !

وبسرعة اتبنى كل الحاجات

وبسرعة بقى فيه نافورة وجنينة كبيرة

وبسرعة اتغيرت معالم المكان تماما

وأصبحت الثكنات أثر بعد عين

ومعلش يا زهر ...

وانا تقريبا خلصت ... يتبقى الملاحظات

1) فكرة هدم الثكنات

تم اثارتها ايام الخديوى عباس حلمى التانى

ومتنفذتش

لكن كمان سنة 1947 المهندس سيد كريم

كانله تصور للميدان

الراجل برضو اقترح التخلص من الثكنات

وجعل الميدان ادارى فقط

ويتحط مكانها البرلمان المصرى

ويتعمل توسعة ف المتحف المصرى وغيره

ولكن دخلنا على حرب 1948

ومتنفذش من افكاره ... الا مجمع التحرير

اللى خلص قبل يوليو وافتتح بعدها

وشكرا

2) الثكنات قطعة فنية فريدة

ومعاكو انه يعيبها كبر حجمها

بعد زحف العمران على الميدان

واكيد تصميمها للجند يعقد المسألة

لكن

ليه محدش فكر يحولها لكلية للفنون الجميلة مثلا

او حتى لمتحف ؟؟

ليه محدش هد نصها بس وساب النص التانى ؟

طب سيبوا قصر النيل حتى بتاع نازلى ..

اهو يفضل حاجة من ريحة المكان ..

ليه يهدوا كل هذا الجمال .... ؟

ولا تكونش الثكنات كان ليها ذكريات أليمة

مع بتوع الثورة ولا حاجة

قالوا لازم نزيلها كيدا ف اللى راحو

ولا إكمن القصور والسرايات كانت وقتها بالهبل

فمكنتش فارقة دى معاهم يعنى .. ؟!!

3) حوار ان الثكنات دى كانت رمز للاحتلال

ولازم نشيلوها وندفنوها ..!!

دى اصلا كانت بتاعتنا يا بقر

اتبنت بفلوسنا وسكنها جنودنا !!

الانجليز كانوا مجرد فاصل وعدنا .. !

دى شاهد على نضال امتد لحوالى 100 عام !!

دى شهدت مظاهرات وشهدا يتساقطون

دى شهدت حركات تمرد على واقع كله خنوع وذل

دى شهدت احداث متتكررش ف امم اخرى

دى حتى كل ما يحجزوا فيها زعيم تقوم ثورة ... !

كفاية انها حضرت بناء المتحف المصرى

من الألف

إلى الياء

من حجر الأساس

لحد الافتتاح

شافت المحتل بيدنسها ثم يخرج منها ذليل

شافت الشعب اللى كان خانع لعقود

بينتفض لزعيم ولموقف ومطلب

شافات لحظة الانكسار

ولحظة الانتصار

3) التحرير بقى حلو

بتغييرات البغدادى مقولناش حاجة ...

بس يختشى بتوع يوليو عملولنا ايه بالـ3 مبانى

اللى حطوهم مكان الثكنات ؟

الفندق وكل شوية ادارة اجنبية تمسكه

وتكسب هيا !

مبنى جامعة القُلل العربية

والنبى لو كانوا عملوه مسمط كان هيبقى أفيد والله

بلا وكسة !

اما مبنى الاتحاد الإشتراكى

اللى تحول الى مبنى الحزب الوطنى

فدا بقى المرة وحيدة تسبب فيها بسعادة للمصريين

لما شافوه بيولع بعد ثورة يناير

فلى هوه يعنى

بلا 10 وكسات

و كنتوا خليتوا الثكنات أحسن

ودا يقودنا الى

4) هما ليه العسكريين عموما

معندهمش ريحة الذوق ولا اعتبار للجمال

وقيمة الأشياء ... ؟!!

5) يقال ان الأرض

ارض الثكنات ما زالت تابعة للجيش

هل دا صحيح ؟؟؟

أصله الطينة م العجينة

وبتوع دلوقتى تربية مبارك وشغل ايده

فهل يا ترى اللى هوه دا السبب

ف هدم الحزب الوطنى بالسرعة دى

وعدم الرغبة ف ضمه للمتحف المصرى كما اقترح

والهدف ف سرعة الخلاص منه هوه استغلال الأرض

باعتبارنا بقينا جيش سمسرة وعمولات

ونوادى وفنادق ومكرونة وأمن غذائى وكدا

6) اه .. حوار دهس المتظاهرين دا طلع من زمان اهو

طب دول كانوا جيش الاحتلال يا

اللى دهسوا الولاد ف القصر العينى

كانت حجتهم ايه ان شاء الله ... ؟!!

7) وآل احنا ف عز عز الثورة

كنا بنقف ف التحرير نهتف

يسقط يسقط حكم العسكر

وقول اتكلم السلطة لازم تتسلم

ويلا ارجعوا على ثكناتكم

هل بت ما المبنى العريق دا لو كان فضل

كان زمانهم بيقولولنا نروح فين ...

محنا ف ثكناتنا يا روح طنط منك له ... ؟!!!

لأ

ايه دا

لأ بقى

كويس انها اتهدت

لأ انا خلاص مستحسنة الفكرة جداااااا

كانوا هيبوظولنا الهتاف ويحرقوا دمنا

لا .. سكة السلامة يلا بالسلامة

:)))

8) الثكنات ارتبطت بكوبرى قصر النيل

اسما وجيرة وعشرة

فبالتالى أى صورة للكوبرى

غالبا هتلاقى جزء من الثكنات باين

ابقوا خدوا بالكوا بقى

واترحموا عليها ..

لما تشوفوها

9) كل شوية حد يطلع يقولى ليه ؟

ليه كدا ؟

ليه عايشين ف الماضى ؟

وليه بتحسرونا ع اللى فات ؟

يا جماعة مش كدا بالمرة .. !

احنا بنشوف الجمال اللى راح ونخلده ما استطعنا

بنفكر روحنا وغيرنا

عشان احنا صحيح ملحقناش نحافظ عليه

لكن نقدر نحاول نحافظ ع الموجود .. والجاى

نعلم ولادنا يتذوقوا الجمال ويقدروا قيمته

نحكيلهم التاريخ عشان يتعملوا منه

وعشان ميكرروش الغلطات

وعشان يمكن بكرة يبقى افضل

وعشان يمكن ما يخيبوش خيبتنا .. ممكن ؟

وبس خلاص خلصنا

تصبحوا على ألف خير