حكاية باب اللوق

 بــــاب اللــــوق

الحدوتة النهاردة عن مكان عمره فوق ال 800 سنة كدا

ف حتة يمكن مش مهمة لناس كتير

بس بما انها ف قلب قاهرتى الخديوية لازم أحكى عنها :)

انتوا عارفين ان منطقة وسط البلد دى زمان

كان النيل بيمشى فيها وبعدين اتحول مجراه بمرور الوقت

وبقى يغمرها الفيضان وييجى ويمشى وكدا

#عارفين؟

فلما جه صلاح الدين مصر وبدأ عهد الدولة الأيوبية

كان تركيزه ع القلعة وما حولها من القاهرة الفاطمية

ومهتمش بالأراضى المغمورة اللى بعيد دى!

قوم وزير صلاح الدين

كان اسمه القاضى الفاضل قعد يعمل اصلاحات ف البلد

وبص لحتة أرض كدا

وسأل دى أرض مين واسمها ايه

قالوله دى أرض اللوق !

وأرض اللوق دى حضراتكم سموها كدا

علشان الفيضان كان بييجى يغمرها وبعدين ينحسر عنها

فتبقى تربتها لينة وسهل رمى البذور فيها بسهولة

أرضها تلوق لوقا

لوق ف اللغة العربية يعنى الشىء اللين ..

ويلوقه يعنى يلينه لوق يعنى .. ناعم

وف احدى المعاجم .. لوقه يعنى اصلح طعمه بالزبد

خلاه طرى وينفع يتاكل يعنى !

الملخص ان الناس كانت بتلاقى التربة ناعمة وطرية

وممكن بسهولة يرموا البذور فيها ويمشوا عليها يدوسوا

فالبذرة تنزل تحت الأرض

وتطلع الزرعة

قاموا سموها أراضى اللوق

وكانت خصبة فقرر احد الامرا الأغنيا

انه يشترى جزء كبير منها

وكان اسمه الامير فخر الدين الشهير بـــ ... ابن ثعلب

الاخ ابن تعلب بقى بعد ما هيشترى الارض دى

هيبنى لروحه قصر وحواليه حديقة و يراعيها

لدرجة انها تبقى جنة

وتشتهر الحتة دى بأسم .. بستان أبن ثعلب

فخر الدين اخد أرض اللوق وما حولها

وكانوا حوالى 75 فدان يا مؤمن !

وبيقولك زرعهم بخيرات الله

وخد عندك

ومتتخضش

نخل - عنب - نرجس - ورد - نسرين

ياسمين - خوخ - كمثرى -لارنج - ليمون - تفاح - جميز

قراصيا- رمان - زيتون - توت شامي - توت مصري

تمر حنة !

دا طبعا غير تربية المواشى وكل خيراتها بقى

وبنى لنفسه منظرة (مطرح يقعد فيه ) ويبص منه

على كل المناظر الروعة دى

وطبعا بستان ابن ثعلب دا كان حواليه سور عظيم وهلما

قوم مات الامير فخر الدين فاتنقل البستان لأبنه من بعده

حصن الدين ثعلب اللى قرر يبيعه !

والسؤال بقى حد يبقى عنده كل الخير دا

و بستان الكل بيتحاكى بيه ويتباع ؟؟

أقولكم لو عرفتم الشارى .. هتفهموا

حصن الدين بن ثعلب بقى يا ترى باع لمين ؟؟؟

السلطان الصالح نجم الدين أيوب

سلطان البلاد نوبة واحدة كدا هوه اللى طلب يشتريه

قوم الواد بايعله البستان بثلاثة آلاف دينار مصرية ..!

نجم الدين ... خد البستان و ما حوله

وقرر يقسمه لحتت محتتة

ويوزعه ع المحاسيب

لكن أهم جزء واكبر جزء استبقاه لنفسه

عشان يعمل بيه ميدان للألعاب

انتوا عارفين طبعا ان نجم الدين هوه اللى كان غاوى

يشترى مماليك بالهبل ويربيهم على ايده

وهوه اللى دخلهم ف نسيج السياسة والحكم ف مصر ..

وعشان يخليهم علطول ف الفورمة كان بيدربهم

و يخليهم يلعبوا ألعاب من باب الفروسية واللياقة

والتنافسية زى لعبة الأكرة

اللى هيا البولو حاليا

الفرسان على الحصنة ويضربوا الكورة

فتدخل ف الحفرة المتفق عليها وكدا

غير رياضات اخرى

نجم الدين عمل ف أرض اللوق ميدان كبييييير

لهذا الهدف

وسماه بـ "الميدان الصالحى" نسبة إلى لقبه الصالح وكدا

وقعدنا بالمنظر دا لحد ما ربنا افتكره

وجت شجر الدر واتجوزت أيبك وقتلته واتقتلت ..

بعدين جه المنصور بن أيبك ولى عهد شكلا كدا

وحكم قطز لحد ما غلب التتار

ثم أنقض شريكه ف المعركة الامير بيبرس

واحداث مسلسل الفرسان وكدا بقى !

وحكم بيبرس واخد لقب .. الظاهر

والظاهر ان الظاهر رغم غدره ببطل زى قطز .. الا انه

ويا للأسف كان حاكم كويس

#الظاهر مصر مينفعش معاها غير كدا !

المهم الظاهر بيبرس قعد على كرسى العرش

وعمل اصلاحات ف مصر والشام والبلد انتعشت ف عهده

وكان شخصية مثيرة ف حماسه ونشاطه وشدته وعطفه كمان !!

وقريت ف احد الكتب حكاية عن انه من حبه للقطط

عملهم حتة أرض مخصوص بوقف يصرف عليهم

عشان تبقى مأوى للقطط المشردة الجعانة البائسة #تخيلوا!

بيبرس القائد العجيب كان حاكم ف النهاية

وقرر يعمل زى أغلب الحكام اللى بيمشوا باستيكة

على ما سبقهم

قوم هادد الميدان الصالحى

وجايبه الأرض

وف حتة غرب الميدان القديم

بنى ميدان جديد أكبر وأعظم وسماه "الميدان الظاهرى"

وكان تحفة يشهد بيها اللى يشوفها

الميدان كان متحاوط بسور عظيم

وكانله باب ضخم

شبه ابواب النصر والفتوح بتاعت الفاطميين كدا

و كان بيدخل م الباب دا الفرسان ف مواكب أبهة

وكان المصريين يقفوا يتفرجوا على أمرا المماليك

وهما لابسين اللى ع الحبل

والجمهور كان بيدخل يتفرج على الفرسان

ويشجعوا الالعاب الحلوة #زمن

الظاهر بيبرس بعد هزيمة المغول

شوية منهم طلبوا يفضلوا ف مصر و أسلموا

وبيبرس اداهم الامان وسمحلهم بالبقاء

وقالهم اقعدوا ف أرض اللوق !

الجماعة قعدوا وعمروا المطرح واختلطوا بالمصريين

لحد ما دابوا وسطهم

غير ان بيبرس جوز ابنه لبنت حد من امرا المغول

يعنى العملية مشيت بسلاسة

وفضلت أرض اللوق تكبر وتعمر

لحد ما الظاهر بيبرس مات

وجم من بعده حكام تانين لحد ما هنوصل لمين ؟

للناصر بن قلاوون

الناصر بن قلاوون انتوا زهقتوا اكيد من سيرته

الجدع دا اللى مشوه مرتين م الحكم ورجع ف المرة التالتة

تبت عليه وممشيش دا

#فاكرينه؟

واحد من الامرا اللى قرفوه ف عيشته ومشاه أول مرة

كان .. الأمير كتبغا اللى مسك الحكم

وبقى اسمه السلطان العادل كتبغا

وكان جبان بيخاف من خياله

كتبغا الفار كان بيخاف لحسن الأمرا التانين

ييجوا ياخدوا السلطة منه

قوم قرر مينزلش الميدان الظاهرى خالص

ولا يهوب ناحيته ليروحه ميرجعشى !

وقرر يعمل تدريباته وهوه ومماليكه

ف الفسحاية اللى قصاد القلعة عشان لو حد طلع عليه

يجرى جوا زى الفرخة ع العشة وكدا

#رجالة_قُلل_صحيح

وروح يا زمان وتعالى يا زمان

والناصر بن قلاوون مسك أخيرا بعد حرب طاحنة

على العرش وكان عاشق للخيول

وعنده أسطبل عظيم

فقرر يخليه جنبه ف القلعة

وعجبته فكرة ان ميدان الفروسية بتاعه

يبقى قصاد القلعة

فقال لرجالته هدوا الميدان الظاهرى دا مش عاوزه

واعملولى ميدان أبهة قصاد القلعة !

وفعلا حصل كدا وبقى الميدان الخاص بفرسان المماليك

وسلطانهم هوه ميدان الرميلة

نرجع بقى لأرض اللوق

واللى جرالها وحصلها ايه بعد الميدان ما أتهد ؟

الحقيقة ان الناصر أدى الأرض دى لواحد من رجالته

المقربين

وكان اسمه قوصون

وقوصون دا كان نمرة وحكاية

حكيناها لما اتكلمنا عن ميدان التحرير

لأن السخصية دى كانت مفترية بحق !

قوصون كان نايب السلطنة وقعد يلغ ف الفتة

وامتلك أراضى بالهبل من ضمنها أرض ميدان التحرير حاليا

وأرض اللوق كمان

#النهب_بإفترا

ولما تقروا حكايته هتعرفوا انه ف الآخر

راح باى كعادة امرا المماليك يعنى

و اتنقلت أرض اللوق من إيد لأيد بعد كدا

واتدهور حالها خالص

السور اتهدم من كل اتجاه والباب العظيم اياه

اندثرت معالمه

ومتنسوش ان منطقة اللوق دى

كانت تعتبر أطراف القاهرة وقتها

قصره دا اللى حصل

وسبحان الله الباب أندثرت معالمه وراح

واتهدت آخر أحجار فيه صحيح

لكن فضل المطرح يتسمى بأسمه

وكل ما حد يوصف لحد يقوله روح عند .. باب اللوق!!

والناس مبقتش تجيب سيرة لا الميدان الصالحى

ولا الميدان الظاهرى ..

ولا بستان ابن ثعلب

وبقوا يقولوا باب اللوق ع الحتة دى وبس !

#غريبة_فعلا

ودخل سليم الأول مصر

واستمر مسلسل الاهمال للمنطقة دى

وبعد ما كانت بستان بقت خرابات ومستنقعات

و منطقة للاوبئة والعقارب واللصوص وقطاع الطرق

وبعدين جت الحملة الفرنسية وبعدها محمد على

وباب اللوق مهملة

وتكاد تكون مضطهدة

عشان لما أهالى باب الخلق اشتكوا من المدابغ حصل ايه ؟

محمد على قالهم ولا تزعلوا

مش عاجبكوا ريحة الجلود وقرفها ننقلها لباب اللوق

ولا يكون ف فكركم حاجة .. !

#باب_اللوق_البائسة

وفعلا تتنقل المدابغ لباب اللوق

وتقعد ياما هناك لحد ما ييجى الخديوى اسماعيل

ويقرر يعمل قاهرته الأثيرة

وينقل المدابغ من المنطقة دى خالص !

والمثير بقى ان المدابغ دى كانت بالضبط بالضبط

ف شارع شريف يا عيال .. !

اللى كان اسمه شارع المدابغ .. تخيلوا !

المهم انه الخديوى اسماعيل هيكلف صديق الدراسة

ومهندسه الهمام على مبارك

بتخطيط منطقة وسط البلد كلها بمساعدة اجنبية

وعلى مبارك هيحط تصور لمنطقة باب اللوق

هيغير تماما من شكلها ووضعها واهميتها

وكل حاجة ف غضون سنوات قليلة

وقولولى ليه يا فطمطم ؟!!!

أقولكم ببساطة لأن باب اللوق بقت ف النص

ما بين ميدان التحرير وبين عابدين مقر الحكم

يعنى موقع استراتيجى مفيش كدا

غير انها ف قلب قاهرة الخديوى

والميدان هيتفرع منه شوارع بتودى على كل حتة

على القصر العينى وع التحرير وعلى عابدين وعلى شريف

الخ الخ الخ

ميدان باب اللوق فعلا موقعه كان ولا زال مهم !

ف عهد الخديوى اسماعيل لازم نبتدى

ونقول ازاى ان الميدان دا كان قبلة لكل الناس الحلوة

ويكفينى أقولكم مثلا ان احمد عرابى سكن هناك !

البيت بتاع عرابى يبقى اللى على اليمين دا

وبعده الشجر

الكلام دا كان قبل الثورة العرابية بسنة او إتنين

وكان الميدان اسمه ميدان الازهار وقتها

وبصوا كدا ف الصورة دى وهتعرفوا ليه سموه كدا

و #الطموا

هذا هوه باب اللوق يا عيال ... آه والنيعمة !

الجونينة دى اتعملت بأشراف مهندس فرنساوى سنة 1875

قالوا نسمى الميدان اسم تانى

نخليه ميدان البستان أو ميدان الازهار

وبلاش .. باب اللوق دا !

الشعب المصرى قال ناخد الحكومة على قد عقلها كالعادة

وقال حااااااضر سموه زى ما تسموه

واحنا هنقول الى احنا عاوزينه ف الآخر برضك #المصرى_أصلى

احد سكان المنطقة كان واحد اسمه محمود حمدى

والاخ دا حكاية لوحده نبقى نحكيها بعدين

بس ملخصها انه كان مهندس وعلاّمة ف مجال الفلك

الراجل حط تقويم مقارن

للتواريخ الميلادية والهجرية والقبطية

وانشىء مراصد وقصص كدا كتير

المهم اشتهر بمحمود حمدى الفلكى

محمود باشا الفلكى دا اللى مات وهوه وزير معارف

سنة 1885 فقررت الحكومة المصرية سنة 1930

انها تحط اسمه على الميدان اللى سكنه ف باب اللوق

وركزوا معايا عشان انا سخصيا اتلخبطت

كدا الميدان كان بستان ابن ثعلب

وبعدين أرض اللوق

و بعدين باب اللوق

و بعدين بقى ميدان الأزهار

أو ميدان البستان

وبعدين بقى ميدان الفلكى

#ماشى؟

وطبشعن مفيش داعى أسهب ف مدح مصر ف عهد الملكية

عشان اكيد زهقتوا من انها ازاى كانت كل حاجة فيها

نضيفة وحلوة وطيبة وبنت حلال وكدا

المنطقة والوسعاية اللى ف النص دى

كان بيمشى فيها تروماى

والمواصلة دى كانلها محطة

واللى بيركب بيروح لحد حلواااااان يا مؤمن

وبعدين بقت موقف اتوبيسات للزمالك وغيرها

ودول صورتين ومحدش يعيط والنبى .. هه

دا اتجاه عابدين

ودا اتجاه التحرير بصو كويس هتشوفوا التحرير

من بعيييييد

دوس ع الصورة عشان تشوفها بشكل اكبر

وأوضح بكل تفاصيلها الجميلة

و من غير عياط والنبى

#عااااااااااا

ودا قصر البستان يا جماعة اللى سكنه الملك فؤاد

قبل ما يبقى ملك

ويروح قصر عابدين

القصر دا بقى مقر لجامعة الدول العربية لفترة بسيطة

وبعدين اتهد واتعمل مكانه عمارة

والعمارة اتهدت بعد كدا

وبقى مكانها جراج البستان القبيح اياه

ميدان الفلكى - الأزهار سابقا - باب اللوق دائما

جم بعد الثورة

وقرر عبناصر يغير أسمه

مجاملة للثورة العراقية

ويسميه ميدان عبدالسلام عارف !

وتحول الميدان إلى عبدالسلام عارف

اللى محدش م الشعب كان عارف مين هوه !

وفضلوا متمسكين بالاسم القديم باب اللوق

وعلى استحياء كدا .. الفلكى !

والميدان معالم كتير فيه تختفى

زى عمارات تتهد ويطلع غيرها

وقصور تتهد ويندثر أثرها

لكن يفضل اسمها زى قصر البستان

او اسم صاحبها زى الفلكى !

عمارة زى دى مثلا لسه موجودة بجمالها

وعراقتها بتتحدى الزمن والقبح والإهمال

اللى من على ناصيتها تدخل شارع شريف وتروح مبنى الاوقاف

مبنى كمان عريق ف باب اللوق هوه سوقها

اللى اتبنى 1912

وما زال باق يتحدى الزمن

وميغركوش المنظر كدا

لأنكم لو شوفتوه من فوق حاجة تانية خااااااالص

لكن العمارة الجميلة دى

اللى ف صدارة الميدان ف اتجاه عابدين

شوفوا حالها بقى ازاى ؟

ولو تدخلوها من جواه تحفة وجناحين

وحاجة حلوة

:(

اما اتجاه التحرير فمختلفش قوى

بس بقى اقل جمالا اكيد بسبب الاهمال

المنطقة اللى ف النص دى

كان زمان بيمشى فيها التروماى

وبعدين لحد التسعينات كانت موقف مينى باص

واتوبيس

دلوقتى بقت مجرد ساحة انتظار للعربيات

دى العمارة اللى تحتها محل مؤمن حاليا

للى كان بيسأل

:)

والراجل بتاع العصير

ومكتبة غريبة كدا عمرى ما فكرت ادخلها معرفش ليه !

واللى على يمين الصورة الصغنن دا كشك الورد الشهير

ف الحتة دى

محدش غاوى ورد مشتراش منه ف مرة

اما أشهر معالم الميدان بقى ومينفعش مبنجبش سيرتها

فهى وبلا أدنى شك قهوة الحرية

ولنا .. هنا .. وقفة

إذ ان القهوة دى كانت ولحد وقت قريب

معقل أهل اليسار

والشيوعيين والعيااااااااااااذ بالله اللى مبيعرفوش روبنا دول

#هع_هع

القهوة دى طلعت ف أفلام كتيييير قوى

ف السبعينات والتمانينات اللى جاى ف بالى حاليا

زوجة رجل مهم والحب فوق هضبة الهرم لأحمد زكى

وغيرهم

بس أكتر فيلم لا يمكن أعدى جنب القهوة دى ومفتكروش

هوه فيلم فوزية البارجوازية

لأن اتصور منه مشاهد ف القهوة دى فعلا

وكل ما أعدى جنبها أفتكر عبواحد وهوه ومراته

وهما عندهم بارنويا من ان حد بيراقبهم

وان كل كلمة وحركة هتتاخد عليهم وكدا

اقعد أضحككككككك

عمرى مادخلت القهوة دى من جوا

بس أتصور ان القعاد فيها فرجة مفيش بعد كدا

:)

باب اللوق زى ما شاف روقان أهل زمان

شاف كمان الثورة وخد منها نصيبه

وبما انه بتفريعاته المتعددة بيودى ع التحرير

وبينفد كمان ع الداخلية

فخد نصيبه من الرصاص

والخرطوش والكر والفر ف أحداث محمد محمود وما بعدها

ورغم انه مهمل ومحدش بيهتم بيه ولا بجماله

الا انه لسه صامد ضد الزمن

وبيعافر بأقل الامكانيات الممكنة

وقبل ما اختم فسحة النهاردة دى عاوزة بس

أقول كام ملحوظة

1) الصورة دى دايما يقولوا انها لباب اللوق

ودا مش صح

دى اما سوريا او لبنان ..

هوه المكان يشبه باب اللوق فعلا لكن لأ مش هوه

لأن عمرنا ما كان عندنا تاكسيات زرقة

ومش معقول فجأة نص العربيات ف الشارع

بقت لونها لبنى كدا صدفة ..!

وعمر الحتة دى ما كان فيها نافورة ابدا برضو !

2) الحاج أحمد عرابى مش كان لازم يعرفنى ايام ثورته

ويستشرنى عشان كنت أنوره وأفطمه ع المصلحة

لما عملوله محاكمة بعد دخول الأنجليز

ونفوه الغلبان

ليه بقى ؟؟؟

عشان الراجل كان ساكن ف باب اللوق

وبينه وبين قصر عابدين فركة كعب

قوم كان ممكن ييجى قصاد القاضى ويستهبل

ويقوله انا مليش دعوة حضرتشك !

انا كنت قاعد ف بيتى بفطر

وبصيت لقيت زمايلى ف الكتيبة بيزعقوا عليا

من تحت البيت انزززززل

روحت نازل ولا كنت اعرف فيه ايه

وهما اللى قالولى !

ويعيشلهم ف دور فردوس عبحميد

ف انا وانتا وبابا ف المشمش دا

لحد ما يخرج نفسه م القضية وكدهون :)

لأ بجد الاشتغالات بتاعت زمان دى

بتاعت عرابى يزحف بالجيش للكصر

ويواجه الخديوى توفيك والنوظام دا

وهوه كان على بعد عشر خطوات بس !!

#نعممممم

3) ربنا رب قلوب وعشان احمد فؤاد رخم وسقيل

ربنا أراد قصره يتهد ويتعمل مكانه عمارة

وبعدين جراج معفن أى كلام

عشان هوه ميستاهلش بجد

#فاتيما_عندما_تكره

4) الأماكن بتختار لنفسها

والميدان دا اتسمى على اسم باب

لميدان فروسية

تبع سلطان

ومات السلطان واتهد الميدان واتهد كمان الباب

وفضل الأسم !

5) ميدان باب اللوق من اكتر الميادين

اللى بيتفرع منها شوارع مهمة

وهوه صرة وسط البلد مش التحرير على فكرة بقى

:)

6) الظاهر بيبرس دا كان راجل كويس

لولاش بس قتل قطز .. كنت هتعبره حاكم مثالى

واتمنى يبقى عندنا حد زيه

#بس_خسارة_الحلو_ميكملش

7) معنى كلمة اللوق : اللين

وفيه ناس بتقول معنها الأراضى العالية

وارض اللوق كانت عالية شوية

ويمكن منها جت كلمة "بتّلق" العامية

اللى بنستخدمها للخشب !

8) باب اللوق ف توقيت ما كان فيه اكتر من 30 سوق

عمران بالبضايع والزباين من كل شكل وصنف ولون

والرحالة حكوا عنه

وعن حاجات شافوها فيه

موجودة صيف شتا .. زى الفاكهة

ودى كانت حاجة غريبة جدا ف الأزمنة دى !

#طول_عمرك_عمار_يا_طيبة_بس_الحظ_الأزرق

وبس خلاص كدا توتة توتة

خلصت حكاية المكان

ونرتوت المنشنات بتاعتكم بقى

وتصبحوا على ألف خير

---

فاتيما , نشر بتاريخ 25/6/2013