السح الدح امبو "الأوحد بن الجمالي" طالع لأبوه

السح الدح امبو "الأوحد" طالع لأبوه

حكاية النهاردة تأتيكم برعاية الحاج أحمد عدوية

لإثبات صحة نظريته القائلة بأنه

السح الدح أمبو والواد طالع لأبوه

وبيقولك يا سيدى انه ف احدى الأزمنة

الى مش بعيدة قوى بعت الأخ المعز لدين الله الفاطمى

بقائد جيوشه جوهر الصقلى عشان يدخل مصر

حلو؟

حلو طبعا لأنه دخل بأقل أراقة لدماء الشعب

واستعمل الحيلة والسياسة والترغيب والجو اللطيف دا كله

وقعد لحد ما بنى القاهرة

وبعت لسيده ييجى يفتتحها ويقص الشريط

قوم المعز جه من المغرب على راس موكب فخيم

فيه كل اهله الاحياء منهم والاموات

آيون جاب معاه رفات اجداداه

وقالك انا أصلى ناوى ألبد هنا مش ماشى تانى

وقعد المعز شوية ووطد دعايم حكمه

ثم ساب الجمل بما حمل لأبنه من بعده .. العزيز بالله

العزيز ف ليلة زرقا خلفلنا الحاكم بامر الله

فورث بعده عشان حظنا النيلة

ثم اتأمرت عليه اخته الكبيرة ست الملك

بمساعدة رجل من الجيش وبعض الحاشية

وانقتل الحاكم بامر الله

فمسك من بعده ابنه .. الظاهر لأعزاز دين الله

وقعد حضرته .. الظاهر يعنى بتاع خمآشر سنة ف الحكم

ومات وورثها من بعده ابنه الأكبر

اللى عرف ف التاريخ بـ .. المستنصر بالله

ولنا ... هنا ... وقفة

الا شهروزة دايما تحب تحكى الحكاية دى

رغم ما فيها من مآسى وقرف

لكن لازم تنحكى ونقول ونعيد ونزيد فيها

لأن الحاج المستنصر اوائل عهده كانت فُلة

الفاطميين كانت فلوسهم كتير وخيرهم بالهبل

والبلد كانت عايشة ف رخاء فعلا

وكتابات الرحالة اللى زاروا مصر ف هذا الوقت

بتؤكد هذا وبشدة

منهم الأخ ناصر خسرو وغيره

اللى شافوا مصر وكتب عنها حاجات مذهل

ة وكلها عجب العجب عن الغنى والثراء والترف والدلع هاحييييييح

آه أيام القرش ساغ تتشترى التلاتين بيضة

وعشر ترطال لحمة وتدفع أجر الشقة

وطمعت ف الباقى طفشت وكدا ...

المهم انه فيما عدا لطشات الساسة والحكام العرر

زى الحاكم بأمر الله مثلا

كانت الدنيا ماشية والشعب عايش

والمذهب الشيعى يكاد يكون لفئات بعينها

ومحدش متضرر ف دينه ومعاشه

وكله تمام الى إن ابتدت العصبيات تزيد

والصراعات تكتر

والطمع يقوى

فئات الجند ف الجيش الفاطمى كانت موزعة

ما بين عدة اجناس الأتراك والمغاربة والسوادن

قوم الست الحاجة نينة ام المستنصر بالله

كانت سوادنية فحبت تستقوى بأهلها وعشيرتها

عشان الولا مستنصر يبقاله عزوة وحرس حديدى

ينفعه وقت اللزوم

والعدد زاد وطبعا الكلام دا معجبش الأتراك والمغاربة

وكل فريق دخل ف حرب تكسير عضام ومراكز قوى

وكله قعد يلعب رست مع بعضه

ومحدش كسب

لحد ما ايه ؟

النيل نقص ف سنة م السنين

وكانت دى القشة التى قصمت ظهر المستنصر

واجبرته على مواجهة الضعف اللى كان فيه

لأنه تبع نقصان النيل القحط والجدب

ولو على كدا .. الطبيعة الواحد يقدر يحاول يقاوم غضبها

لكن المشكلة كانت ف تدخلات البشر وحقارتهم

لما استغلوا المحنة دى عشان يركبوا السلطة

الفصايل المتناحرة ف الجيش الفاطمى استغلت الفرصة

وكل فريق ابتدى يوسخ في الأفعال لأقصى درجة

اللى عرف يقطع طريق بضايع عمل

واللى عرف يسرق قدر

والخناقات ما بينهم وصلت لأدنى درجة

لدرجة عملت انفلات خلى شيوح المنصر

والعصابات وقطاع الطرق

يتحكموا ف المواصلات بين الأقاليم

ويعدوا اللى على شوقهم وبس

وينهبوا البضايع حتى بتاعت الدولة

وكمان هيدخل منهم ناس على قصور الخليفة ينهبوها

وترافق مع ذلك .. القحط والجدب يعنى

المجاعة وفقر الحال والجوع اللى وصل البشر

انهم ياكلوا القطط والكلاب

بعد موت الدواب ونفوق السمك والطير

وبعد شوية لما الكلاب والقطط خلصت

والامن انهار تماما والسلطة عجزت عن أى فعل

فالناس بقت تاكل بعضها

أيوه تحولنا الى زومبى

الجوعى بقوا يعملوا خطاطيف

ويصطادوا بيها المارة ف الطرقات

ويشووهم وياكلوهم

وكان اغلب الضحايا ستات واطفال

وضعاف البنية من الرجال

والخليفة يبعت احد عماله عشان يحل مشكلة ف مكان ما

فيتلموا عليه يوقعوه من على بغلته

فيجرى ينجو بعمره

فيمسكوا البغلة ياكلوها ف لحظتها

فيبعت الراجل حراس يقبضوا على المشاغبين

ويصلبوهم

فتانى يوم الناس تلاقى هياكلهم العظمية مطرح ما اتعلقت

واجسادهم متشفية ومتاكلة .. !

#الجوع_كافر_وابن _حرام

الناس كانت بتئن من الأسى والتوحش والصراعات

وكمان من ضعف الخليفة وعجزه

الراجل من غًلبه باع دهب وتحف قصره

وحليات قبور ابائه واجداده .. !

وكان عشاه بيجيله صدقة

ابن تغرى بردى بيقول لما حد راح يزروه

"فوجدوه وقد ذهب سائر ما كان بعهده من أبهة الخلافة

حتى جلس على حصير "

الملخص .. البلد انهارت

وف خلال كام سنة كدا بيقولوا بتوع 7 سنين عجاف

المستنصر قال جاااااااااااااى

وقرر يشوفله حل

أى حل للمصيبة دى اللى عرفت ف التاريخ

بإسم .. الشدة المستنصرية

تعمل ايه يا منص

تعمل ايه يا منص

وبس تاهت ولاقاها

كان عنده والى ف الشام .. مسك دمشق مدة

وبعدين تولى عكا وأظهر براعة وحسن تدبير

المستنصر متعرفوش مين اللى شار عليه الشورة دى

وقاله هات الراجل دا يلحقك ويلحق الدنيا

وقد كان

المستنصر بعت لهذا الوالى

وقاله تعالى الحقنى شوف اللى جرالى

وامسكها واعدل المايلة

والى عكا قاله عينى لكن بشروط

اولها تدينى صلاحيات تامة

المستنصر محسبهاش كتير

ضربوا الخليفة على عينه قال مصر خربانة خربانة

تعالى يا بنى وانا موافق

الجدع مكدبش خبر وحّضر حاله ومحتاله

وحضر حالاااا

مين اللى جه يا شهروزة ؟

الأخ بدر الدين الجمالى والى عكا

كان أرمنى الأصل

ومملوك لجمال بن عمار والى دمشق الأسبق

ومن هنا جه لقبه لأنه انتسب لجمال سيده السابق

وعرف من يومها بالجمالى

ولقبوه بابو النجم

وسموه بدر عشان كان زى القمر وحليوة ... أرمنى بقى

:)

الحاج بدر اترقى ف المناصب

لحد ما تولى دمشق بعد مولاه جمال

ثم عكا

وبين كرامة ف شغله وشعبيته ف الشام

المستنصر بعتله يحضر الى مصر ليكون المنقذ

والحبل اللى يتشعلق فيه عشان يخرج من بير الخراب

وبدر الجمالى اشترط تطلق ايده ف السلطة

وفعلا

أول ما وصل عمل حاجة

زى مذبحة القلعة بتاعت المماليك كدا

لم رؤوس الطوايف ف الجيش الفاطمى على اختلافهم

وعملهم ولايم ورا بعضها

قوم ايه ؟

اللى يحضر يا دوب يسلم ويقعد ع السفرة

يروحوا جازرينه ودابحينه

وبعدين يقولوا اللى بعده

الاول التانى التااالت

لحد ما خلصوا عليهم جميعا

تانى حاجة واهم حاجة .. بعد الخطوة دى

كانت حل الجيش تماما

الجمالى فهم انه مش هيقدر يسيطر عليهم

حلهم بعد ما قبض ع المشاغبين

وحد يسالنى ؟

اومال حارب بمين يا شوشو ؟؟

اقولكم مهو جاب معاه من الشام اهله وعشيرته

ورجالته اللى أغلبهم كان من الارمن

والجند المرتزقة الموالين له وكدا

كان عددهم الظاهر محترم ومهيب

لأنهم عملوا قلق لجند الجيش الفاطمى وفلوله

والغلبة كانت للجمالى اللى بعد فرض الامن

ابتدى يلم الزومبى

ويقتل اللى مفيش فيهم رجا

ويقطع روس ويحبس روس بموافقة الخليفة

«وقد قلدك أمير المؤمنين جميع جوامع تدبيره

وناط بك النظر في كل ما وراء سريره»

ويجيب بدر رجالته ويمسكهم المناصب

ومحدش قدر يفتح بوقه

المقريزى بيحكى عن الحكومة وقتها بأنها كانت

" دولة أرمن " وش كدا

وداس الجمالى بنزين وعمل اصلاحات

ف كل المستويات وساب الأرض للمزراعين 3 سنين

لحد ما اتعافوا واتعافت

وعمل ابواب القاهرة ... الخ

وتوطد نفوذه لأبعد حد

ولقبه بعض المؤرخين بـ "سيد مصر"

وبقى هوه الخليفة الفعلى الرسمى فهمى نظمى

بينما المستنصر الخليفة الشكلى

وأنّص ساكت وقابل احنا كنا فين وبقينا فين

كان قاعد ع الحصيرة رجعله سرير ملكه

ولو بالمنظر وبس حتى أى حاجة ... رضا

ومشينا على هذا الحال وكله شغال

بدر كان عنده عيال بقى

واكتبلى يا بنى ع اليافطة الآتى

الحاج بدر الجمالى وولده

لأ مكنتش يافطة واحدة

دول يافطتين

لأن الجمالى استعان بأتنين من ولاده

وهنسمع اسمهم الأشهر والاكثر تواترا

الأفضل ... والاوحد

الافضل الظاهر كان العاقل والرزين

ودراع ابوه اليمين وايديه ورجليه

وهوه اللى هيخلفه بعدين .. ويورث الوزارة قدام

اما الاوحد بقى فدا حكاية

على رأى وردة .. غريبة ومش غريبة دنيا وفيها العجايب

الواد يختشى ابوه قاله روح اسكنكرية الماريا

واحكمها

حلو؟

لحد دلوقتشى حلو

الاوحد افندى واللى اخد لقب مظفر الدولة

شد الرحال على الثغر وقعد هناك

والظاهر الجو عجبه والبحر والدنيا وكمان السلطة

دورت دماغه

أتلم عليه ف وقتها كام نفر من عشيرته واصحاب

ه اللى كانوا ف الشام

تحديدا نفرين اسمهم جمال الدولة وأخوه علم الدولة

ولاد بحلم الجمالى

مين ؟

بحلم الجمالى دا مفيش كلام كتير عنه

بس الظاهر انه كان من رجالة جمال بن عمار

وبدر الدين الجمالى لما كان هناك ف الشام

الظاهر كان بينهم ضدديات

وحصل بينهم عركة وبدر قتل بحلم الجمالى

والعيال ولاده شالوا ف نفسوياتهم وكتموا

لحد ما جاتلهم الفرصة

اللى هيا ايه يا شهر ؟؟؟

قالك اول ما عرفوا

بتولى الاوحد بن أمير الجيوش لاسكندرية

قالولك بس يا معلم قشطة احنا نروحله

و نلعب ف دماغه ونوزه على ابوه .. يخلعه !!

حد ف آخر توتير هيعلى صوته ويقولى

بتهرجى يا شوشو .. يخلع مين لهى سايبة ولا سهلة كدا ؟

أقولكم آه ممكن

اصلكم متعرفوش اسكنكرية

اقولكم انا

اسكندرية لحد الفتح العربى لمصر كانت هيا العاصمة

وقلب أم الدنيا

اهلها كانلهم شكل تانى وجو تانى ودماغه تانية

بعد كدا الفسطاط بقت العاصمة

اسكندرية تحولت الى ثغر يتحصن

لحمايته من غزو الأعداء

لكن فضلت منعزلة عن الفسطاط والعسكر

والقطائع والقاهرة عواصم مصر المتتابعة

لدرجة انه الخلفاء كانوا بيعينولها والى مخصوص

مختلف عن والى مصر .. يبقى مسئول عن خراجها

وتحصينها وامورها وكل حاجة

كأنها مكان منفصل وولاية مختلفة عن الاخرون

اسكندرية بقى

:))

وبسبب كدا اسكندرية فضلت سنية الهوى وبشدة

وكانت أى انقلابات او خروج على السلطة

بتكونلها منها نصيب

والمتمردين يتحصنوا فيها

كانلها طبيعة خاصة

المهمممممممممم

الواد الاوحد هيتلم على رفاق السوء

ويتخنوها ف دماغه

ويدوها والزن يشتغل

ابوك كبر

اخوك الافضل فرخة بكشك عنده

انتا اولى تورثها

انقلب عليه

جوزك بيحب .. هيتجوز عليكى .. هنتشرد ف الشوارع

حد هيقولى أكيد مسمعش كلامهم يا شهروزة

شاعقول يقف قصاد ابوه وكدا !

يؤسفنىىىىى أقولكم لأ محصلش

الواد دماغه زقزقت فعلا

ومشى وراهم ..!

والاخبار وصلت لبدر الدين الجمالى ف القاهرة

والحق يا حاج ابنك بيعلن العصيان عليك

وبيقول هيستقل باسكندرية عنك

والحق بقى قبل مالموضوع يوسع !

الشاهد ان بدر اتصرف بحكنة وروية

وبعت احد اخلص رجاله

واسمه ابو الفرج ابن المعزى للواد

الحاج ابو الفرج سافر وقابل الأوحد

وقاله بابا زعلان منك

ومتسمعش كلام العيال الوحشة دى وارجع لعقلك

وروح بوس ايد الحاج ليغضب عليك

الاوحد شكرله ومشاه قفاه يقمر عيش

#يازين ما خلفتى يا زينب

بس والموضوع كبر .. بدر أب برضو وعاوز يلم المنظر

راح باعت الأفضل .. الأخ الأكبر لأخوه الاوحد

عل وعسى يعرف يقنعه ويرده عما ينتوى

قوم اييييه ؟

طبق الأصل العلقة الاولانية لا قلم زايد ولا قلم ناقص

الأوحد رفض كل توسلات اخوه

وان اللى بيحصل بيدمر سمعة العيلة

ومستقبلها السياسى...الخ

وبرضو مشاه قفاه يقمر عيش

وقاله اسكندرية دى تاعتى اناااااااااااا

ومحدش له دعوة حتى بابا ... هه

#احتمال يكون طلعله لسانه عشان يغيظه كمان

مش بعيدة

بس ورجع الأفضل لبابا يقوله

الواد أوحد مش عاوز يسيب اسكندرية

واللى انتا شايفه اعمله يا حاج

الحاج بدر هل بت ما يسكت !

لأ طشبعن

وبيقولك بقى ان الجمالى حضر جيش معتبر

حاجة كدا تخوف أجعص جعيص

وراح بنفسه على راس الطلعة دى

وسافر بجنده وحاصروا اسكندرية

قد ايه ؟؟

شهرين بحالهم يا ثااااامح

ليه كدا ؟

فيه ناس بتقول ان بدر كان عاوز يدى فرصة للأوحد يراجع نفسه

لكن ناس تانية بتقول اهل اسكندرية السبب !

ازاى ؟

أصلهم تربسوا ووقفوا ف صف الاوحد

محدش قالنا هل وقفتهم سببها حبهم للاوحد

ولا كيدا ف الجمالى

ولا هيا محض نحررة دم اسكندرانى ولا ايه ؟

بس الشاهد انهم استقتلوا للدفاع عن المدينة

كعادتهم يعنى قصاد أى هجمة عليهم

وطلعوا ترابنتين الجمالي لحد ما منع الأكل والمية

والاوحد قال انا عيل

وبعت يتصالح مع ابوه

وبس أمر الاوحد بفتح أبواب المدينة

ودخل أمير الجيوش سى بدر الجمالى على حصانه منتصرا ف هذه المعركة

واشترط خروج الاوحد منها فوراااااااا

وخلاص يا خويا انتصرت واتهببت واتنيلت

وعملت اللى عاوزه

انزلك البحر شوية وكل اكلة سمك حلوة

واقعد شيش ع الكورنيش

وخد شايك وقهوتك وشهيص وبعدين استذوق

وسمعنا جمال خطوتك

ومع السلامة والقلب داعيلك

هل بدر الجمالى هيعمل كدا ؟

عيب عليكو انا معوداكو ع الاخلاق تشى برضك ..؟

اومال الخسة والوضاعة نوديها فين

مش لازم نشوف منها شوية ؟؟

بيقولك بدر قرر يقعد ف اسكندرية شوية

يصيف ويروق ويصلح ما افسده ابنه ف المدينة

لكنننننننن

سيادته هيقرر يعاقب اهل الثغر

ليه ؟

عشان بالضبط اللى قاله بعد ما لم أعيان اسكندرية

وشيوخها وقالهم نصا

" أنتم ساعدتم إبنى لمخالفة السلطان

وحسنتم له ذلك وقتلتم رجال السلطان وجنوده

وخسرتموه الأموال"

نعم يا روح طنط !

قوم ايه عقابا ليكم ع اللى عملتوه

هتلموا من بعضشيكم بتاع 120 ألف دينار غرامة

عشان تحرموا تعملوا عليا ثورة تانى

أه ... هنلم هشان عاوزين نشترى

#شكّارة_بالكهربا

طب انت معرفتش تربى ابنك وخرج عن طوعك

وانقلب عليك

احنا ذنبنا ايه ف الليلة دى انا مش فاهمة .. ؟!

الناس كانت بتدافع عن المدينة بتاعتها

يعنى المطلوب منهم ايه لما يدخل عليهم العسكر بتوعك

يشنقونا ونسكتلهم مثلا .. ؟!

قصره .. المزغود فرض الغرامة دى

والناس لمت من بعضيها عشان يسدوا بوقه

وبعدين بيحكوا ان سعادته قعد يتمشى ف ارجاء المدينة

يشوف حجم الخساير وكدا

طبعا كان فيه خراب واهمال وبلد متحاصر بقاله مدة

وجه يوم الجمعة وعاوز حضرته يصلى بالناس

عشان يبروز انتصاره على ابنه

قوم ايه ؟

اسكندرية طلع انها بعد الفتح الأسلامى مكنش فيها

غير مسجدين كبار .. وبس

1) الجامع الغربى

وبناه عمرو بن العاص واتعرف باسمه لفترة

2) الجامع الشرقى

والأتنين كانوا ف حالة بائسة خصوصا الجامع الشرقى

اللى كان ف منطقة العطارين

قوم بدر الجمالى بعد ما لم الفلوس

راح مجدد بيها المسجد

:)))

حد هيقولى

طب مهو راجل حلو اهو يا شهروزة ..؟

اقولكم

ابضنننننن

مهو لم الفلوس وعمل جامع جديد وسماه باسمه

عشان يخلد نفسه ويفكر الاسكندارنية بانتصاره

ومش ببلاش ولله وللوطن يعنى

والمسجد دا فضل هوه المتدلع والاول ف كل حاجة

يصلى فيه الحكام والوزراء والاكابر

لما ينزلوا الثغر لحد ما انتهى عهد الفاطميين

ولما صلاح الدين الأيوبى مسك

قرر يحول الدفة من عنده لحتة تانية #الكيد_بقى

قالك عشان نقضى على أى نفوذ وذكرى للفاطميين

والمذهب الشيعى ف كل حتة عشان ربنا والاسلام

بس على مين يا حدوقة

دا صراع سياسى بحت

اسكندرية كانت سنية من يومها يا عم !

القصد .. المسجد صمد لعوادى الزمن والقرف

وأيام المماليك الزرقا ثم أيام العثمانلية السودة

لحد ما جت الحملة الفرنسية

ورسمته ف كتاب وصف مصر

كان بيتعرف بأسم مسجد الجيوشى

وبعدين بقى ينعرف من أأيام الايوبيين بمسجد العطارين

و بيقولوا كان فيه 4 مآذن على جوانبه الأربعة

لكن كله اتهد ومفضلش غير واحدة بس

وبعد رحيل الفرنساوية

ومجى محمد على ونسله من ابناء واحفاد

المسجد كان اتهدم خالص

قوم ف عهد الخديوى عباس حلمى التانى

تم اعادة بنائه

واعيدت عمارة المسجد من اول وجديد ف نفس مطرحه القديم بالمللى

لكن شكله كان اختلف عن القديم تماما

ومفضلشى من ريحة بدر الدين الجمالى ف الحتة دى

غير اليافطة وبس

اللى انكتب عليها الآتى:

" بسم الله الرحمن الرحيم .. إنما يعمر مساجد الله

من آمن بالله واليوم الآخر وأقام الصلاة وآتى الزكاة

ولم يخش إلا الله"

أمر بإنشائه السيد الأجل أمير الجيوش

سيف الإسلام ناصر الإمام كافل قضاة المسلمين

وهادي دعاة المؤمنين أبو النجم بدر المستنصري

عند حلول ركابه الإسكندرية

ومشاهدة هذا الجامع خراباً فرأى بحسن ولائه ودينه

تجديده زلفى إلى الله تعالى

وذلك في ربيع سنة سبع وسبعين وأربعمائة!!!

حتى ف المساجد النفاق بلغ الآفاق #ولاد الهرمة

المهم ... بعد كل هذا نرجع للأوحد

اللى انقلب على بابا بدر

بعد ما ابوه ما غوروه على القاهرة

ماذا فعل به يا ترى ؟!!

الشاهد انه سابه .. كوسة بقى ابن الوزير وامير الجيوش

حد يقدر يحاسبه

تبقى عيبة

انما لو كان م الثوار ولا الاخوان

كان زمانه اتعلق على باب زويلة طبعا

القصد

بدر الجمالى ساب الاوحد يتلهى ف أى مصيبة

وغاب عنه شوية ومفيش شهور

وجاتله اخبار ان دلوعة بابا ملموم على شوية صيع تانين

غير الاولانين !

نسينا نقول ان الجمالى لما دخل اسكنكرية

قتل ولاد بحلم الجمالى غريمه القديم

قالك عشان ابوهم وحشهم نوديهم يتونسوا بيه وكدهون

قوم ربنا يشاء يبعتله عيال تانين

اسمهم شجاع الدولة

وصاف المكينى صاحب بابل

ومرهف الدولة .. مين دول يا شهروزة ؟

ولا أعرف والله بس واضح

انهم كانوا مهاويس سلطة واستغلوا طمع الاوحد

فحبوا يغامروا معاه قوم الخبر وصل بدر

والراجل الصراحة جاب اخره

وقبض عليهم وشنقهم كلهم

طب والاوحد ؟

بيقولوا انه مقدرش يقتله معاهم ... حنية الاب بقى

قام سجنه ف دار وربطه بسلسلة ف اخرها كورة حديد !

ايه شغل مجلة ميكى دا !!!

بس والواد اتحبس وقعد يكلم ف الكورة الحديد دى

ويشكيلها همه

قد ايه يا شوشو ؟؟

تمآشر شهر

سنة ونص بحالهم يا ثاااامح

ولسبب غير معلوم ومحدش عرفه لحد دلوقتشى

اذ فجأتن كدا بدر الدين الجمالى قرصته عقربة واتلبش

وقام على الاوحد

وحديد وبعيد ليعمل معاه الدنيئة

وبيقولوا انه أمر الحراس بمنع الاكل والمية عنه لأيام

ثم ف ليلة دخل عليه الحارس ف محبسه

وراح خانقه بشويش بشويش

الا دا ابن امير الجيوش برضك ميصحش

ومات ابن ابوه عشان الحاج يستريح منه ومن قرفه

ومؤامراته اللى واضح انها كانت لا تنتهى

حد يقولى تحليك ايه يا شهر ف الحكاية دى

اقولكم

:))

تقريبا كدا يستهيألى ان اخوه الافضل

له ضلع ف الحكاية دى

وتلاقيه زق الأب على الاخ عشان يفضاله الساحة

وفعلا دا اللى حصل بعدين

اه

بعد موت بدر الدين الجمالى مسك

الملك الأفضل أبو القاسم شاهنشاه

ابن الملك أمير الجيوش بدر الجمالي الارمني

وعاصر المستنصر بالله

ثم كانله دور كبير ف خلافة ابن المستنصر

واخدان الحكم من نزار الأولى بالخلافة بعد ابوه

وعمل شغلانة وهيصة كدا

وعاصر الحفيد .. الآمر باحكام الله

اللى استنى لما كبر ف السن وسيطر

وراح متفق مع ناس قاتلوله ... الوزير الأفضل

عشان يخلص من سيطرته على كل حاجة

وآه اتقتل ف النهاية برضو

لكن المهم انه كان واكلها والعة 27 سنة

وبعد موته مسكها ابنه كمان .. احمد بن الأفضل !

وحاجة مسخرة لا تحدث كثيرا

بس لما تحصل .. يبقى انتا اكيد اكيد ف مصر

وتوتة توتة خلصت الحدوتة

وتفضل الملاحظات بتاعت كل مرة

1)

اهل اسكندرية جدعان من زمان

عندهم قزحة كدا وميحبوش حد يحكلهم على مناخيرهم

وبغض النظر عن مين معاه السلطة ولا نيلة

ولا ايه الحكاية

اول ما تولع محدش بيتخيل رد فعلهم

وعملوها كتير مع أى حد يدخل عليهم

وشايل سلاح من زماااان ولحد ثورة يناير

أذكر انهم كانوا تقريبا أول محافظة الداخلية تختفى منها

وعلى أخر نهار يوم جمعة الغضب

مكنش فيه حد بدبورة وكاب يستجرى يظهر !

2)

حلو قوى الخيار وفاقوس دا

يعنى انتا معرفتش تربى عيالك يا حاج بدر

ومحبتش تعاقب ابنك

قوم جاى تتشطر ع الناس العادية

والمواطنين اللى ملهمش ضهر .. !

3)

بدر الدين الجمالى اللى اتسمت على اسمه الجمالية

قتل ابنه

عادى مش اول نفر عملها

غيره كتير واشهرهم السلطان المملوكى

المؤيد شيخ اللى قتل ابنه ابراهيم

وعملها الحافظ لدين الله .. الخليفة الفاطمى

اللى قتل ابنه حسن

اللى برضو حاول يعمل عليه انقلاب

وكان عاوز يمسكها ومكتفاش بلجنة سياسات

وقاله سيب العرش واحكم انا وكدا

هيا السلطة وشهوتها اللى متعرفش ابن ولا أب

ولا روابط ... مهما حاولوا يحافظوا عليها

برضو الطمع غلاب

والسياسة فعلا على رأى عم جاهين .. مهلكة

4) فيه ناس بتشبه السيسى بالجمالى

قالك اصله جه ينكذ البلد ويلحقها وبتاع

طب يا حيلتها انتا وهوه الجمالى انقذها عشان يورثها

هوه وابنه وحفيده

وداس على أى حد يقف قصاده حتى ابنه الاوحد

ولما مسكها الأبن التانى .. الأفضل ثم الحفيد

كانت عزبة ووسية واكلوها الحرامية

وفضلت ف عهد الوزراء تسوس وتخوخ

لحد ما سقطت دولة الفاطميين ف النهاية

بسبب كل هذا ... فأزيكم بقى ؟

5) بخصوص مسجد العطارين

الجمالى لما لم الغرامة لمها من اهل اسكندرية

مسلمين واقباط

يعنى ايه يا شهر ؟؟

يعنى حضرتك أى حد مسيحى معدى جنب الجامع

تقوله انتا ليك فيه زى ما لينا بالضبط

ودافع فيه زى ما دفعنا

وزى ما ليه ف كل حاجة ف البلد دى بالنص

ولا هما بالنص ف الظلم والبهدلة والموت .. وبس !

وعود على بدء

عدوية قالها كلمة حكمة

الوااااد طالع لأبوه

الأوحد زى بدر ... فولة وانقسمت نصين

واحد عاوز السلطة له لوحده والباقى كله طز

ولو كانوا الأب ولاّ الأبن ولاّ الاخ

ولا كاين مين ما يكون

تصبحوا على ألف خير

----

فاتيما , نشر بتاريخ 30/12/2014