حلاوة وعروسة وحصان .. قصة حلاوة المولد

حلاوة وعروسة وحصان

قصة حلاوة المولد وومتى بدأ احتفال المصريين به 

كل سنة وانتوا ومصر كلها طيبة

يا عيال

حكاية النهاردة اكيد

هتكون عن عيد من أعياد المصريين

وبقول المصريين وليس المسلمين فقط

ولما نسرد تفاصيل

هتفهموا قصدى ..

بس فلاش باك لمنتصف سنة 87

وكان اخويا

عنده يا دوب سنتين وشوية

وبابا مقعده على حجره

وبيغنيله غنوة لطيفة قوى ... هنا

كتبها صلاح جاهين عشان يجسد بيها

كم المسخرة والمرمطة والبهدلة

للى كانت بتحصلنا واحنا عياااااال

ف مولد النبى #آه_والله

الأخوة اللى من جيلى فما أكبر

هيفتكروااكيد المناسبة دى

اللى كان ليها طعم ودفا

وحاجات كتير معرفش اوصفها صحيح

بس قادرة أحسها

وأفتقدها ...

الحقيقة ان الأحتفال بمولد النبى

كما تذكر كتب التاريخ مبدأش الا مع الفاطميين

لما جم مصر سنة 969م

لكن قبلها ازاى الحال ؟؟؟

المؤرخين اتفقوا فيما بينهم

ان المصريين معرفوش الاحتفال بالمولد

ف زمن الخلفاء الراشدين

ولا ف عصر الامويين

ولا العباسيين كمان ومن تحت ولايتهم

زى الطولونيين والاخشيدين ...

لكن بدخول جوهر الصقلى مصر

وبناء القاهرة وقصورها

ثم استقبال المعز لدين الله الفاطمى

بدأ عهد جديد

له مظاهره وناسه واعياده واحتفالاته كمان

المقريزى -زكريا- بيقول

ان الفاطميين كان لهم اعياد

ومناسبات خاصة بيهم احتفلوا بيها

جنب اعياد المصريين (مسلمين واقباط)التقليدية

زى عيد الفطر والأضحى

ووفاء النيل والغطاس وغيرها

بيقولك الفاطميين لنشر مذهبهم الشيعى

كانوا بيحتفلوا بمولد كل من :

1)مولدالإمام الحسين

2)مولد السيدة فاطمة الزهراء

3)مولدالإمام على

4)مولدالإمام الحسن

5)مولدالرسول(ص)

6)مولدالخليفة حاكم البلاد

وكل مولد من دول له طقوسه

وخروج الحاكم للناس

والولايم وتوزيع العطايا الخ الخ

الحقيقة كانوا ناس حلوة

وبتوع فرفشة وهيصة

لكن ....

الباحثين كتير منهم بيقول

ان سبب اهتمام الفاطميين بالمناسبات والأعياد والأحتفال مكنش لله وللوطن

ومكنش الهدف منه بس

التقرب للشعب اللى جم يحتلوه

لأ كمان ..

كان الهدف انهم يلهوا الناس طول الوقت

ويخلوهم ينبسطوا ويهيصوا

وميقعدوش يحاسبوا الحاكم والوالى

زى ما مبارك لهى الشعب المصرى بالكورة كدا !

سبب تانى كمان وهوه ان الفاطميين كانوا شيعة

وكان هدفهم يغرقوا المصريين

ف جو الموالد والصوفية

والمظاهر اللى تاخدهم بعيد حبة

عن المذهب السنى اللى بيعتنقوه

وماشيين عليه

والحقيقة انهم نجحوا ف كدا ف البداية يمكن

لكن ف النهاية بمجرد سقوطهم

امام جيوش صلاح الدين والأيوبيين ..

رجعت مصر سنية ف لحظة

ولا كأن حاجة حصلت .. !!

والناس بتحكى ان الفاطميين

كانوا مبحبحين وإيدهم فرطة قوى

يعنى كانوا بيهتموا بالأكل

وتعليق الزينات والفوانيس

وإظهار الفرح زائد قراءة القرآن طبعا

وبيحكوا كمان ان كان فيه مكان اسمه

(دار الفطرة) مخصوص لعمل الحلويات والولايم

وف سنة من السنين كانت مصاريف الاحتفال

بالضبط بالمللى

كما ذكر احد الباحثين ..

467,140 ألف دينار

يعنى قربنا على نص مليون !

ودار الفطرة كان مكانها جنب قصر الحاكم

وكانت بتتقام السرادقات للعوام والبسطاء

ويتعمل عشرين قنطار حلويات

تترص على 300 صينية

وبتتوزع على الناس فى الجامع

الحلويات دى كانت عبارة عن سكر يابس

ف اشكال وألوان

ويخرج موكب الحاكم الفاطمى من بين القصرين

عشان يحضر الاحتفال مع الناس ف الأزهر

وسط رجالته وقواده

وكان الحاكم بيحضر قراية القرآن ف الجامع

مع قاضى القضاة وكبار رجال الدولة والأعيان وبعدين يرجع قصاد قصره

يقعد ف (المنظرة) اللى زى منصة كدا

بتطل ع الشيعب

ويسمع مع الحاضرين قرآن تانى

وخطبة بالمناسبة دى

ثم يشاور للحضور بمنديله

ومش كاتب على طرفه أجيله

ويبدر الدهب ع الواقفين

وهيا بنا نشهيص بقى

ويبدأ الاحتفال الشعبى ف الشوارع

والحواة والبياعين

والكل اللى له مزاج يعرض بضاعة او مهارة

واللى بيفسح عياله

واللى جاى ينشل او يسرق

او يتفرج

او ياكل على موايد الحاكم

الخ الخ

المهم ان المصريين

اتروقوا ف الحقبة دى احتفالات وبهرجة

وجمال بدوى بيقول

ان الفاطميين كانوا أذكيا

لأنهم درسوا نفسية الشعب اللى جم يحكموه

وعرفوا ان المصريين بسطاء دمهم خفيف

بيحبوا السهر والمغنى والفرحة

فحبوا يدخلولهم من الحتة دى

زى ما عمل بعديييين غيرهم

وهنحكى برضو عليهم

قصره ..

انتهى زمن الفاطميين ودخل صلاح الدين مصر

ومشى بالأستيكة على كل ما فات

عشان يحارب المذهب الشيعى بكل صوره

فقرر يلغى الاحتفال بالمولد النبوى

وكان واعى لنقطة الألهاء دى

فقال مفيش احتفالات وكفاية قراية القرآن

ويبقى يوم عادى وبس خلاص كدا

طبعا المصريين قالوا حاضر

لكن على مين ؟؟

حنينهم للفرحة فضل موجود

فقرروا اذا كان الاحتفال بالمولد رسمياانتهى

فاحانا هنحافظ على بعض مظاهره

واللى نقدر نحتفظ بيه

وكان المظهر دا هوه ... الحلويات

فضلوا المصريين يعملوا الحلويات دى

طول السنة وربطوها بالمناسبات السعيدة

زى الجواز

وبقت تتعمل عشان يهادوا بيها

كل اتنين بيتجوزوا ...

العروسة للعروسة والحصان للعريس

والحلويات التانية للمعازيم

وراح الأيوبيين

وجه المماليك اللى زمنهم كان حروب ونقار ودم

لكن سابوا المصريين يحتفلوا بالمولد

كل سنة وشاركوهم كمان

لما كانوا بيفضوا م القتل والمذابح

وابن اياس وصف ف بدائعه

آخر مولد نبوى احتفل بيه المماليك

قبل دخول العثمانيين مصر

وكان قنصوه الغورى هوه السلطان

وعمل احتفال فخيم وفُللى قوى

اصلا قنصوه كان مبذر وفلاتى

وبيمد ايده ف جيب أى حد معدى وينهبه

وفلوس جاية م الهوا

فميصرفش ليه ويدلع نفسه

وبالمرة الشعب يهيص وينسى الوكسة ؟!

وحكى ابن اياس ازاى اتنصبت قاعة

بأربع عمدان واسعععععة وكبييييرة

واتزينت بالمصابيح واتملت صوانى اكل وحلويات

وحضر الغورى وسط جنوده وأمرائه وحاشيته

وخلاص يا خويا فنجرت من جيب أبوك

وفلست البلد اكتر ما هى فلسانة

جالك الموت يا تارك الصلاة

وسليم الاول بعترلك كرامتك

وحياتك كلها ف معركة فاصلة

وبعد ما قتلك زحف ع القاهرة

وبعد ما حارب سليم الاول ..

طومان باىالسلطان الأخير للمماليك

وهزمه للأسف

مصر اصبحت عثمانية

وطبعا مولد ايه

وهيحتفلوا دا ايه

والبلد مهزومة وجريحة وبتنزف ...؟!

واصلا العثمانلية

كانوا رخمين وكُبب كدا فلغوا الاحتفال

عشان يلموا البلد

ويمنعوا أى تجمعات ف الشوارع

وأى هيصة ليحصل انشفيلات امنى ولا حاجة !

وبعدين مسك خاير بيك

الشهير بخاين بيك ولاية مصر تحت الحكم العثمانى

والراجل كان خاين كما يقول الكتاب

وحكينا عنه زمان لو تفتكروا .. هنا

المهم ...

خاين بك لقى الناس مش طايقاه وكارهينه

وبيدعوا عليه ف الشوارع

قالك اما أرجعلهم مولد النبى يحتفلوا بيه

يمكن يحبونى وينسوا مصايبى ويحلوا عن قفايا

وحدث بالفعل

حدث انه الاحتفال بالمولد رجع تانى ..

لكن لم يحدث ان المصريين نسيوا جرايمه

وفضلوا يدعوا عليه يدعوا عليه

لحد ما مات موتة الكلاب الجربانة

#آه_والله

وقعدت مصر تتنقل من والى لوالى

تحت الحكم العثمانى

وبقت الأزبكية حى الكبرات والاعيان

هى موقع الاحتفال

لقربها من بيت نقيب الأشراف فى مصر وقتها

وبيحكى التاريخ انه ف ليلة غبرة

جه نابليون مصر واحتلها

فيما يعرف بأحداث الحملة الفرنسية

قوم عشان يضبط حاله

جاب اوسخ نفر ف عيلة البكراوية

وعمله نقيب للأشراف رغم ان عيلته كلها

كانت رافضة اكمنه فلاتى وخمورجى وفيه كل العِبر

بس طبعا قدم خدماته لنابليون

فعينه المخسوف الأخرانى دا

.. نكيبا للأشراف ونكبة عليهم

وبغض النظر عن قصته

اللى حكيناها قبل كدا .. هنا

الا ان العزاء الوحيد

ان الوغد دا اترسم

مع سيده نابليون الوغد الآخر ف رسمة

أرختلنا الحدث

وهنشوف فيها المصريين وهما

بيملوا منطقة الازبكية

اللى كانت بركة وقتها ف منتهى الجمال

وحواليها قصور الوجهاء وكبرات مصر

والصورة دى اترسمت

سنة 1798 يعنى سنة اولى غزو فرنسى

نابليون على فكرة

هوه اللى صرف ع الاحتفال دا

وصمم عليه لأنه فكر زى ما فكر كل المحتلين

ازاى يتقرب للشعب دا ويدخل ف زاورقه

ويهادنه ..

ويستعبطه لحد ما يحقق الأهداف من وراه

وبعت الحاج بونابرته للبكرى

فلوس و العاب نارية وزينة

وصمم انه يحضر بنفسه الليلة

عشان يشوف الشعب العجيب الغريب دا

ازاى قادر يفرح ف عز هزيمته!

وغار سارى عسكر نابليون

وانقتل كليبر ورحل مينو مترنحا بعد 3 سنين

ودخلت مصر ف عهد جديد

هوه عهد محمد على وابنائه واحفاده

ومولد النبى فضل باقى

برونقه ومقامه ومحبته ف قلوب المصريين

وليم ادوارد لين وغيره

من رحالة ومؤرخى الفترة دى

اغلبهم اتفق ان مولد النبى

وغيره من موالد كانت غريبة ف شوية حاجات

جنب الجو الدينى المعتاد

يعنى معظمهم اتفق

ان جنب قراءة القرآن

وتوزيع الاكل ع الغلابة وغيره

كان فيه رقص وخلاعة وسهر وحشيش

ونصابين ونشالين الخ

غير حلقات الذكر وما فيها

والطريقة اللى كان البعض بيتمايل بيها

ودى بالنسبة للاجانب كانت عجايب

وبالنسبة للناس المعتدلة كانت مش مقبولة

لكن معتادة ف ايام زى دى

وبالنسبة للبسطاء والغلابة والمجاذيب

كانت محببة

وعادة

ورغبة وتولة

وقول ما شئت ..

المهم ان الأحتفال بمولد النبى

فضل ف الازبكية فترة طويلة ..

لحد ما قرر الحاج محمد على يجفف بركة الازبكية

وانتقل الاحتفال بكل مظاهره للمشهد الحسينى

يعنى عند سيدنا الحسين يا ولاد

وبس ركن هناك من ساعتها

ومتزحزحشى بقى

وبقت تنعمل شوادر فى اماكن مختلفة

يتباع فيها حلويات المولد والعروسة وغيرها

والناس تروح هناك تشترى وتتفسح وتمرجح العيال

و يحضر المولد بشرية من كل المحافظات

ويجيوا البياعين بتوع النشان

وبياعين الحلويات والمشروبات

وبتوع السيرك

غير المداحين والمنشدين والسميعة والمحبين

وكل بيغنى ف يومها على ليلاه

الكبار والصغار

واللى جاى يسترزق

واللى جاى يغسل همومه وينول الرضا

وتبقى الليلة الكبيرة

:))

ولحد النهاردة مولد النبى

بيتعمله احتفال وهيصة

والمصريين مبيقطعوش العادة

لكن كل دا

ولسه متكلمتش عن أجمل ما ف المولد من بهجة

العروسة والحصان!

وعشان نحكى حكاية عروسة المولد والحصان

ازاى الفاطميين بدعوهم؟

والحقيقة فيه روايات كتير

منهاان الحاكم بامر الله بتاع الملوخية يوك دا

آل كان مرة خارج ف موكبه ف احدى احتفالاته

مع الشيعب بمولد النبى

وكان معاه مراته

وكانت حلوة ولابسة ابيض وتاج على شعرها

وافلام كدا

قوم احد صناع الحلويات حب يجامل الزعيم

فعمل عروسةوالعروسة كانت شبه الموادم

ولابسه زيها وبتاع

وعمل فارس راكب حصان وماسك سيفه

آل عشان يبقى دا الحاكم بآمر الله وكدهون

وطبعا القصة غريبة

قولولى ليه؟

اولا عشان الحاكم بآمر الله كان راجل نكدى

ومقرف وخانق الشعب اصلا

فاحتفال ايه

وناس بتحبه ايه

ثم مينفعش قال مراته معاه

طب دا راجل ميتعاشرش اساساااا

ثم محدش متمسك بالرواية دى ..!

القصة التانية ودى الاكثر قبولا ..

وهى ان الحاكم بأمر الله كان برزالته المعتادة

مانع يتعمل زينة وغنا وهيصة ف أى وقت

الا فقط مولد النبى

هوه بس المسموح فيه بكدا ..

المصريين انتوا عارفينهم منع غنا وهيصة ايه

واللى يتجوز هيتجوز سوكيتى كدا ؟

أومال نلهيهازاى

الا بعوالم واكل ودوشة عشان يقدم ع المصيبة دى!

القصد المصريين قالوا

مش انتا منعت الغنا والزينة

الا ف مولد النبى وبس

طب وحياة نينة ام الحاكم

ما مكسرينلك كلمة

ومحناش متجوزين الا ف مولد النبى

عشان نرقص ونهيص ونفرح برضو

بالمرة نغتت عليك وعلى نينتك!

وبس حضرتك بقى المصريين

يستعدوا لجواز عيالهم من قبل مولد النبى بشويتين

وجنب الشوار وخلافه

كانوا بيعملوا العرايس الحلاوة والحصنة

عشان قبل الجواز يهادوا بيها العريس وعروسته

وبكدا بقى صناع الحلويات

بيستعدوا للموسم من قبلها

وارتبطت ظهور العروسة والحصان ف سوق الحلاويين

بالمولد النبوى الشريف

وحد يقولى بعد الحاكم بآمره

ما ربنا خده فوووق

ايه اللى حصل ؟

اقولكم ولا حاجة

الناس عجبتها الفكرة

وبقت تتجوز طول السنة صحيح

بس بقت بتعمل العروسة والحصان ف المولد بس

بس برضو لسه مقولناش ...

اشمعنى عروسة وليه ملونة كدا

وعندها مرواح ف ضهرها

وليه حصان .. ؟ واشمعنى ؟

ودول اختيار مين المصريين ولا الفاطميين ؟؟

الحقيقة ان المقريزى بيقول

انه المعز لدين الله عمل اول احتفال

بالمولد النبى بعد دخول الفاطميين لمصر

ف رابع سنة

التلاتة اللى سبقوها كان جوهر الصقلى

هوه اللى ممشى البلد

ومكنش بيعمل أى احتفالات

المهم جه المعز

واتعملت هيصة وهوليلة

وهنقل بالنص

"حمل صاحب الشرطة السفلى السماط

وقصور السكر والتماثيل

وأطباق فيها تماثيل حلوى

كما حمل المحتسب قصور وتماثيل سكر

وفيها شجرة تشبه شجرة البرتقال

كل غصونها وأوراقها وثمارها من السكر

وقصرين جميلين من السكر أيضا"

(المقريزى اللى بيحكى يا عيال)

طباخين دار الفطرة كانوا بيتفننوا

ف عمايل الحلويات من السكر اليابس

ويعملوا منها أشكال ومناظر

عرايس (تماثيل سكر) واشجار وقصور .. الخ

والمقريزى بيوصف بدقة ازاى تماثيل السكر دى

"منفوخة وتجمل بالأصباغ

ويداها توضعان في خصرها

وتزين بالأوراق الملونة

والمراوح الملتصقة بظهرها"

طب اشمعنى التماثيل

والفاطميين شيعة مش بتوع اوثان يعنى .. !!؟

الحقيقة فيه كذا تفسير للحكاية دى

لكن مجملها ان العروسة لها أصل ف اكتر من ثقافة

ناس أرجعتها لعروسة النيل الشهيرة

واللى كانت اسطورة فرعونية معروفة من زمان

زائد اكتشاف عرايس ف الأثار بتاعتنا

شبه كدا

فيه ناس تانية قالتلك لأ دى أصلها قبطية

وبيقولوا المتحف القبطى فيه تماثيل

من العاج والفخار واحدة فيهم

فيها عروسة تشبه عروسة المولد بتاجها وهيئتها!

ناس تالتة تقول دى أصلها رومانى

من ايام ما كانوا بيحكموا مصر

وفيه تماثيل وأشكال مشابهة لعروسة المولد

اسمها والله اعلم كدا "التناجرا" .. !!

وناس رابعة بتقول ان أصلها فارسى

والفاطميين اتأثروا بيها

وبالثقافة الفارسية عموما

وف كل الاحوال فرعونية رومانية قبطية فارسية ..متفرقش

اللى يفرق عندى انها مصرية خالصة

بدأت عندنا وقعدت واستقرت وبقت علامة مميزة

وبعض المؤرخين بيفسر الحكاية

بأن الفاطميين قعدوا 4 سنين يرتبوا حالهم

ويعرفوا نفسية المصريين شكلها ايه

ويدرسوا ثقافتهم كمان

فلقوا التماثيل الفرعونية ف كل شبر ف البلد

ولقوا كمان حاجة مهمة

ان الاقباط كانوا بيعملوا

اشكال من الحلويات ف أعيادهم فقلدوهم .. !

ولقوا المصريين عجبهم الحال ..

فداسوا بنزين بقى

وبقت هيصة :)

وطبعا مفيش داعى أقولكم

العروسة والحصان بتعملوا ازاى

دى سهلة ومعروفة قوالب وبتنشف ..الخ

وبيقولوا ان العروسة بتاعت زمان

مبقاش عليها الطلب خلاص

وانتشرت العروسة الصينى البلاستيك

وبالتالى المصانع قلت

لحد ما بقوا يتعدوا ع الصوابع

واكتفى الجميع بعمايل الحلاوة بكل انواعها

سمسية وحمصية وغيرها من اشكال وابداعات سنوية

وابتدت العروسة الحلاوة تندثر

زى كل صناعة جميلة ف البلد دى #للأسف

وانا تقريبا اوشكت أخلص

لكن فيه شوية حاجات صادفتنى

وانا بجمع معلومات عن هذا الأحتفال السنوى

اللى بقاله ف مصر اكتر ... من ألف عام

فيه ناس حاليا بتقول

ان الاحتفال بمولد النبى حرام

وانه الفاطميين الويحشين الشيعيين

حبوا يقلدوا النصارى

لما لقوهم بيحتفلوا بمولد السيد المسيح!

ونفس الناس دول هما اللى بيقولوا

ان المولد بدعة ولا لزوم لها

والعرايس حرام ومتاكلوش حلويات المولد

عشان كدا بترتكبوا ذنب

:((

والحقيقة ان الفاطميين

صحيح هما اول ناس بدعواالاحتفال

بمولد سيدنا النبى عليه افضل سلام وصلاة

لكن المصريين سبقوهم من قرون طوال

قولولى ازاى؟

لأنه ببساطة وعلى حد قول احد المصريين البسطاء

ف مقالة قريتها

ان الأقباط اتعودا يحتفلوا بمولد العذرا

وبمولد سيدنا عيسى

وبأعياد القديسين ..!

يعنى فكرة الموالد دى عادة مرية

من قبل الفاطميين ومن بعدهم ..

لسه بنحتفل بالأوليا زى السيد البدوى

وغيره

الملخص انها كانت

وفضلت عادة مصرية أصيلة نابعة مننا

مش من حد تانى ..

وزى مولد النبى ما ساب أثاره

بالحلويات على معدة الشعب

وبالبهجة على قلبه

ساب كمان أثاره على ثقافته ولغته الدراجة

يعنى .. مثلا

لما واحدة تحب توصف واحدة مبهرجة

ومكياجها أوفر بتقول دى

" عروسة حلاوة "

لما بياخدونا من فوق لتحت

ومن تحت لفوق زى ما عملوا وبيعملوا لسه

ف ام الثورة دى كدا بنقول دى

"مراجيح مولد النبى"

ولما تحب تعبر عن انبهارك وازبهلالك من حاجة

اكمنها قلبت على كل الالوان والأشكال

لدرجة تمخولك فتقول

"يا حلاوة المولد"

وعلى الصعيد الشخصى بقى

ايه حوار العرايس الصينى

ام تل وشعر اصفر دى ان شاء الله

احنا هنستهبل ؟؟؟

انا العروسة ان مكنتش مشلفطة

ومش باينلها وش من قفا

والوانها زاعقة

وشكلها يقرف الكلب الحزين

متتعداش عندى عروسة مولد!

ولواللى بيعملها

مكنش عنده بلهارسيا وسل ورمد ربيعى

وبيشرب سجاير وبينفخ

وفيه كل العبر

ولو متلمش عليها النمل اول ما اروح بيها

متتعدش عندى عروسة مولد!

ولو بعد ما روحت

مجتش أزقها متعمدة عشان تقع وتنكسر واكلها

وأكل معاها علقة من ابويا

عشان العروسة ملحقتش تقعد يوم حتى

متتعداش عندى عروسة مولد!

وان مكنتش الوان مراوحها دوشة وفاقعة

وأشيلها وأحطها ف شعرى وردة

او على كتافى واتخلينى زيها مثلااا

متتعدش عندى عروسة

واخيراااا

عشان طولت عليكم بقى

اليكم الملاحظاااااات

بس الاول

دوسوا ع اللينك دا

وشوفواالصورة لشادر بيع الحلاوة بتاعت المولد

سنة 1901

1) الاخوة بتوع الأحتفال حرام وبدعة وكدا

هوه احنا يا نبقى شبه اللى انتوا عاوزينه

يا اما تحرموا علينا عيشتنا

وتقاليدنا واعيادنا

وبهجة بقالها الف سنة ... ؟!

2) طب لما هيا حرام

مالكم بيها بقى

وبتبيعوها ليه طيب ..

متسيبوهالنا

وبلاش تحطوا

التاتش بتاعكم

ولا هيا السبوبة حكمت ؟!

3) واهم حاجة بقى الاخوة الشيوخ

بتوع حرام وميصحش

متخليكوا ف الجرى ورا السلطة

والقصور

والعربيات

والكرش بتاعكو اللى بقى قدامكو متر

وسيبولنا شوية التفاريح والأعياد

والفرحة اللى محليناش غيرها دى

وبطلوا نعيق الهى ينكد على عمركم

انتوا والعسكر ف ليلة واحدة

قادر يا كرييييم !

3) الحاكم بامر الله منع الزينة والأفراح

عشان يعكنن ع الناس

قوم الناس لمتلوه الجوازات كلها ف المولد

عشان تجبره وتكسر مناخيره

وتعمل اللى على كيفها برضو

#شعب_ابن_لذينة

ويحضرنى ف هذه الموناسبة

أذكّر الحاكم بامر الله

بقول الأوستاذ محمد افندى منير

لو كنت جاى تغنى روح اسأل قبلا احنا مين ؟

و4)مقدرش اتخيل طفولتى من غير عروسة المولد

ولا حصة الرسم

اللى كان أهم رسماية ف كراستها

هيا العروسة بألوانها

وبهجتها كانت موضوعى المفضل

ودايما الميس كانت بتاخدها

وتعلقها ف اوضة الفنون مع باقى الرسمات الحلوة

5) فيه مصادر بتحكى عن تماثيل السكر

وأشكال عرايس وطيور وحيوانات

اللى كانت بتتعمل ف احتفالات وفاء النيل

من قبل الفاطميين

يعنى مولد النبى مصرى أصلى

واحنا لمينا من كل عصر وناس عدوا علينا

أبهج ما فيهم

ورمينا اللى مش عاجبنا

واختفظنا باللى يشبهنا وبنحبه

راح الفاطميين مثلا

بس فضل الفانوس والعروسة والكحك

وخد عندك كل من جاء ورحل ...

على مدى كام الف سنة !

6)الحلاوة والمظاهر دى فرصة حلوة

خلتنى أحبب يوسف ابنى

ف النبى واخلاقه وقلبه الحنين

وكان نفسى اجيبه حصان حلاوة بس ملقتش وقتها

لكن قعدنا نرسم عروسة وحصان

ونتكلم ونغنى ونحكى

وهوه يتعلق بالسيرة وبصاحبها

وفاكرة انه دايما كان يقولى بعد كل حكاية

نفسى اشوف ربنا

نفسى اشوف النبى

نفسى اشوف سيدنا يوسف

نفسى اشوف الملايكة

وقلبه يرفرف ويحبهم ..

القصد انه يعنى الواحد

ممكن يستخدم البدع والحاجات دى

عشان تبقى فيها خير

مش كل بدعة شر ..

آه والله

7) اللى بيقول العروسة البلاستيك أحسن

عشان السنان وكدا

طب لو مكنتش العروسة والحصان والحلاوة

اولادنا واخواتنا خريجى كليات طب الاسنان

هياكلوا عيش ازاى

ولا ميلاقوش شغل وينحرفوا بقى .. !

مش نشغل الجمجمة ونفكر بشكل اوسع ؟!

#حلاوة_مولد_النبى_تكافل_اجتشماعى

8) دى عروسة المولد طبعة ... 2014

تقريبا .. اللى عملها قصده العروسة

أو اللى فضل منها بعد حكم الأخوان والعسكر

هوه الفنان اللى عملها

لاسع بس حاجته حلوة

واسمعوا الغنوة دى بحبها قوى ...

واولا واخيرا ودايما

الله ما صلى وسلم وبارك عليك يا نبى

كل سنة وانتوا طيبين

ومولد النبى الجاى مصر تكون خالية من كل الاوغاد

قولوا #انشالله

وتوتة توتة ... خلصنا

#تصبحوا على الف خير

...

فاتيما , نشر بتاريخ 13/1/2014